“Ko e Ngāue Makehe ʻa Pilisitoló,” Ko e Kaumeʻá, Fēpueli 2026, 26–27.

Pilisitolo ko e Fakamoʻoni ki he Papitaisó

Fai ʻe Amberleigh Broker

Ko ha talanoa moʻoni mei USA.

Mālō e Lelei! Ko Pilisitolo au. Ko e FAKALATA TAHÁ ʻa ʻeku hoko ko e fakamoʻoni ki he papitaiso ‘o hoku kiʻi tuongaʻané!

ʻI he taimi naʻe papitaiso ai aú, naʻe fakamoʻoni ki ai ha toko ua: ko hoku taʻoketé mo hoku tuongaʻane lahí. Ko e fakamoʻoní ko ha taha ʻoku tuʻu ʻi he veʻe faiʻanga papitaisó ke fakapapauʻi ʻoku fakahoko ʻa e papitaisó ʻi he founga naʻe akoʻi mai ʻe Sīsū Kalaisí.

Kapau he ʻikai ke ke puli kakato hifo ki he loto vaí pe ʻoku hala hono fakalea e lotú, kuo pau ke toe fakahoko ʻa e papitaisó. ʻI hoku papitaisó, naʻe meimei ʻasi hake hoku vaʻé ki ʻolunga mei he vaí.

Naʻá ku fuʻu manavasiʻi, ka naʻe siofi fakalelei ia ʻe he ongo fakamoʻoní, pea ta koā naʻe ʻikai ʻasi hake hoku vaʻé mei he vaí.

Naʻá ku FIEFIA LAHI ʻi heʻeku ʻiloʻi te u lava foki ʻo hoko ko ha fakamoʻoni ʻi he hili hoku papitaisó. Naʻe papitaiso hoku kiʻi tuongaʻane ko Lailení hili ha taʻu ʻe taha mei heʻeku papitaisó. Naʻá ne kole mai ke u hoko ko ha fakamoʻoni!

Naʻá ku talaange ʻio (meʻa pau ia), ka ko hono moʻoní, naʻá ku kiʻi hohaʻa. Ne lahi fau ʻeku ngaahi fehuʻí! Ko e fē feituʻu ʻoku totonu ke u tuʻu aí? Ko e hā e meʻa ʻoku totonu ke u lea ʻakí?

Ka, ʻoku ʻikai fiemaʻu ia ke ke hohaʻa! Naʻá ku ʻeke kotoa ʻeku ngaahi fehuʻí, pea ʻoku ʻi ai haʻaku faleʻi maʻau:

Mahalo ʻe ʻi ai ha sioʻata ke tokoni ke sio ki loto ki he faiʻanga papitaisó. Ka ʻoku totonu ke ke siofi ʻa e papitaisó, kae ʻikai ko e sioʻatá. Tuʻu ke ofi ki ai koeʻuhí ke ke lava ʻo sio ki he meʻa kotoa pē!
ʻI he taimi ʻoku fakahoko totonu ai ʻa e papitaisó, malimali mo kamokamo ho ʻulú. Kapau ʻokú ke fakatokangaʻi ʻoku fiemaʻu ke toe fakahoko ʻa e papitaisó, talaange leʻosiʻi ki he tokotaha ʻokú ne fakahoko ʻa e papitaisó.
ʻOua te ke manavasiʻi ke fai ha ngaahi fehuʻi! ʻI he taimi naʻá ku hohaʻa aí, naʻá ku talanoa ki heʻeku tangataʻeikí. Naʻá ne fakamatalaʻi mai e meʻa kotoa pē kiate au.

ʻOku ou fiefia ʻaupito ʻi heʻeku hoko ko ha fakamoʻoni ki hoku tuongaʻané. Mahalo ʻe ʻi ai ha ʻaho te ke lava foki mo koe ʻo hoko ko ha fakamoʻoni!