Na Cakamana ni Matanikatuba

A vakaotia o Gracie na iotioti ni nona iku panikeke, biuta na nona disi ena siqi, ka dreta mai na nona katodreketi.

“Gauna ni masumasu vakamatavuvale,” a kaya o Ta.

Eratou tekiduru kece sara ena rumu ni gade. Na taci Gracie drua, o George, a cavuta na masu. “Yalovinaka ni vukei keimami me dua na siga vinaka e koronivuli,” a kaya o koya. “Yalovinaka ni vakalougatataki Na me na bula vinaka. Yalovinaka vakalougatataki ira na vuniwai me ra kila na sala me ra vukei koya kina.”

Na tinai Gracie e a tauvi mate ni mona. Ena gadrevi me sele o koya. Era a vakanuinui na vuniwai ni na daumaka na veika kece, ia era sega ni vakadeitaka rawa.

Ni oti na masu, a mokoti iratou kece o Na. “Au na lako tale tiko vei vuniwai nikua. Nuitaka ni datou na rogoca eso tale na isaunitaro.”

Vakacava ke sa na mate o Na ka’u sega ni rawa ni vosa tale vua? A vakataroga o Gracie. A rere sara vakalevu o koya. A sega ni rawa ni raitayaloyalotaka ni na sega ni mokoti Na se raici koya ni oti na vuli.

Ena siga o ya, a gole ki na kalasi o Gracie, vakacagicagi, kei na vakasigalevu me vaka ga na kena ivakarau. Ia a vakananumi Na tikoga. Ni tuburi koya na rere, a vakasamataka na nona sere ni Lalai taleitaki. Sa rawa me duavata tawamudu na matavuvale ena ituvatuva nei Tamada Vakalomalagi, a lagata lo e lomana.

Ni rau yaco i vale mai koronivuli, rau a cici yani ki loma o Gracie kei George ka mokoti Na vakaukauwa. “A vakacava na nomu laurai?” A taroga o Gracie.

“A toso vinaka,” a kaya o Na. “Keirau se sega tikoga ni kila e levu na ka. Ena vica tale na noqu laurai ena macawa mai oqo ni bera na veisele.”

A marau o Gracie me raici Na. Ia, a se lomaleqa voli ga.

Ni oti toka e vica na siga, a taqiri na lali ni katuba. Ni dolava na katuba o Na, a rogoca o Gracie na lagasere.

A tu vata kei Na o koya e matanikatuba ka rai yani vei ira eso na itokani ni matavuvale mai na lotu kei na koronivuli. Era a lagata tiko na sere ni Lalai. “Keimami a vakasamataki kemuni tiko ka vinakata me keimami kauta mai eso na vakacegu,” a kaya mai e dua vei ira. Oti era sa qai tekivu lagasere tale.

A lako talega mai ki na katuba o George. A vuki sara o koya vei Gracie. “Daru lagata vata kei ira!”

Rau a dreta na nodrau kote o Gracie kei George ka cici yani e tautuba me rau tomani ira yani. Era a lagata e cake ena kena levu ga era rawata:

A raica o Gracie ni tavoya laivi na wainimatana o Na. Na tacina lailai o Rosie, a kubeta toka na yavai Na ka vakarorogo talega.

A tuburi Gracie mai e dua na yalo veivakacegui. A se lomaleqataki Na tikoga o koya. Ia a kila tu ni lomani iratou o Jisu Karisito. O Koya e Kalou ni cakamana. Ka vaka, me kila o Gracie ni na vinaka na veika kece.

Droini mai vei Bethany Stancliffe