“Na Veitalanoa kei Emily me baleta na Papitaiso,” iTokani, Janueri 2026, 34–35.
Na Veitalanoa kei Emily me baleta na Papitaiso
O Emily e dua na yabaki 9 mai Sinaloa, Mexico. Keirau a tarogi koya ena so na taro me baleta na nona papitaiso.
Vakamacalataki iko mada mai.
Au dau taleitaka na boroboro, droini, vavi ivakalomavinaka, cakacaka ni liga, na danisi kei na lagasere vata kei ira na taciqu. Au dau vinakata talega me’u gole ki na vanua ni susu manumanu nei tukaqu me’u vodo ose.
O a vakavakarau beka vakacava mo papitaiso?
Ena lotu vakamatavuvale, rau a vakavulici au na noqu itubutubu me baleta na vakabauta, veivutuni, papitaiso, kei na isolisoli ni Yalo Tabu. Au a vakavakarau talega ena noqu wilika na ivolanikalou, masu, ka dau sarava na vidio baleti Jisu Karisito. Au taleitaka vakabibi na vidio me baleta na papitaiso ni iVakabula ena Uciwai na Joritani. Au taleitaka na tikina a basika mai kina na ruve vulavula, ka matataka na Yalo Tabu.
Keirau a vakatovotovotaka talega kei tamaqu na ivakarau keirau na duri tu kina ena tobu. Au a rere ni lako sobu ena wai, ia a vakavulici au o tamaqu ena sala me’u tekiduru kina, tabonaka na ucuqu, bobo na mataqu, ka bale lesu vakamalua ki ligana. Keirau a vakatovotovotaka vakalevu na ka oqo, ka ena siga au a papitaiso kina, a rawarawa sara me’u cakava.
Na cava a duatani kina na nomu papitaiso?
O ya e dua na siga tawaguilecavi rawa vei au. Eso na noqu lewe ni matavuvale era a vosa, cabora na masu, ka tu me ivakadinadina. Au a lagata talega na “Vaqara Drodrolagi Ni Bula Vesu No” ena nona veivuke na neimami dautabapiano ni Lalai. Ni oti na noqu papitaiso, au a vakila na Tamaqu Vakalomalagi kei na Luvena, o Jisu Karisito, vakavoleka sara vei au. Au a tagi ena marau.
E a duatani talega baleta ni’u a nanuma me’u sureta eso na noqu itokani kei na lewe ni matavuvale era sega ni lewe ni Lotu mera gole mai ki na noqu papitaiso, ka ra vakadonuya mera lako mai. E dua vei ira na noqu itokani oqori e se dau lako tikoga mai ki itaviqaravi ni lotu eso kei rau na nona itubutubu.
O dau nanuma vakacava na nomu veiyalayalati ni papitaiso?
Au saga me’u nanuma na noqu veiyalayalati ena noqu dau lako ki lotu, taura na sakaramede, ka vakananuma na iVakabula. Au dau vakavinavinaka ni’u kila ni a solia na Nona bula me baleti au. Au dau masu talega ena veisiga, wilika na ivolanikalou, qaravi ira na tani, ka segata me’u tamata vinaka.
Kivei ira na noqu itokani era vakarau papitaiso, au nuitaka ni ko ni na toro voleka cake yani vua na Tamada Vakalomalagi ka vakila na Nona loloma uasivi sara!