Ni O sa qai Papitaiso Oti. Na Cava E Tarava?

Nanuma tiko na gauna o a ciqoma kina na isolisoli ni Yalo Tabu ni oti nomu papitaiso? Ena gauna oqo sa rawa ni dau tikoga vata kei iko o Koya ni o digitaka na dodonu. Na Yalo Tabu e dau veitaratara vata kei keda ena noda vakasama kei na veika eda vakila. Na vakarorogo ki na Yalo Tabu ena vukei iko mo digidigi vinaka ka kunea na reki dina.

Vakasamataka Mada: Na gauna cava beka o a vakila kina na Yalo Tabu? E rawa ni dua na ka levu se dua na ka lailai!

Ena gauna a mai sorovaka kina o Jisu Karisito na noda ivalavala ca, a vakarautaka kina o Koya vei keda kece meda veivutuni. Na veivutuni sa ikoya na vuki tani mai na digidigi cala ka gole vua na Tamada Vakalomalagi kei Jisu Karisito. Erau marau vakalevu ni da digitaka meda veivutuni baleta e vukea meda toro voleka vei Rau.

Vakasamataka Mada: Na cava e dua na ka o rawa ni cakava ena vukei iko mo gole vua na Tamada Vakalomalagi kei Jisu Karisito?

Ni oti na nomu papitaiso, sa ka bibi cake sara na sakaramede. Ena gauna oqo ni o taura na sakaramede, o sa vakavouya tiko na veiyalayalati o a cakava ena papitaiso mo maroroya na ivakaro ka muri Jisu Karisito. Ni o sega ni maroroya vakavinaka sara na yalayala oqo, na sakaramede e ivakananumi vakamacawa ni ena vuku i Jisu Karisito, sa rawa ni da veivutuni ka vosoti.

Vakasamataka Mada: Na cava e dua na sala o rawa ni cakava kina na sakaramede me bibi cake ena macawa oqo?

Na valetabu e Nona vanua tabu na Kalou. Na yabaki o sa yabaki 12 kina, sa rawa ni o lako ki na valetabu ka vukei ira tale eso ena nomu laki papitaisotaki ena vukudra na mate. E muri, sa rawa ni o cakava eso tale na veiyalayalati me baleti iko vata kei na Tamada Vakalomalagi. Na veika o vulica ena valetabu ena vukei iko mo vakataka cake na Tamada Vakalomalagi kei Jisu Karisito!

Vakasamataka Mada: Na cava e dua na ka o rawa ni cakava ena gauna oqo mo vakavakarau kina mo lako ki na valetabu?