Dua na iTekitekivu Vou

E sa na yabaki walu tiko o Alexandre ena vica ga na siga mai qo! A marau vakalevu o koya baleta ni rau a navuca tiko kei Ta e dua na kana ni siganisucu digitaki ni oti na vuli. Ni rau yaco yani na daukaulotu ki na vakayakavi, a tukuna vei rau o Alexandre na veika kece me baleta na totoka ni keke jokeliti a digitaka o koya.

“Ena walu taucoko ka ra na yadua na kadrala, ka sega ni dua na keke me walu na kadrala!”

A dredre o Elder Lauener. “Qori e rogorogo vinaka. Maroroya eso me baleti au!”

Ni oti na vakayakavi, rau a vakavulica na daukaulotu e dua na lesoni me baleta na papitaiso. A vuki yani o Elder Doyon vei Alexandre. “Ni ko papitaisotaki, o sa digitaka mo muri Jisu Karisito.” A tukuna o koya vei Alexandre me baleta na nona papitaiso ka wasea na nona ivakadinadina. “A vukei au na Yalo Tabu me’u vakila na marau baleta ni siga oya au a digitaka kina me’u muri Jisu Karisito.”

A sega ni waraka rawa o Alexandre na nona siga ni papitaiso!

Ia ni sa laki moce o koya ena bogi oya, a dredre me moce. A taleitaka o koya na vakasama me savasava ka vou. Ia me na savasava tikoga vakacava o koya ni oti na papitaiso?

Ena mataka tarava a taubale yani o Alexandre ki koronivuli vata kei Ta. “O sa vagagalu sara ga ena mataka nikua,” a kaya mai o Ta. “Na cava e leqa?”

A cegu levu ga o Alexandre. “Au diva me’u rawa ni papitaiso vakalevu cake.”

“Baleta?” A taroga o Ta.

“E rawa ga vakacava me’u na savasava tikoga ni’u papitaiso oti?” a taroga o Alexandre. “Au dau guguileca e veigauna—me vaka na vakabula kei na vakavinavinaka vei ira na qasecake kei na dau vosota na taciqu lailai. Au kila ni’u na cakacala tikoga. E vakadua ga na papitaiso, ka’u na sega sara ni savasava tale vaka oya.”

A tu vakadua o Ta ka vakasota mata kei Alexandre. “Sa dina. Oqori e rairai veivakadrukai vakalailai. O nanuma tiko na gauna kedatou a veitalanoataka kina na caka yalayala ena papitaiso?”

A deguvacu o Alexandre. “Au nanuma vakakina.”

“Ni ko sa papitaiso, o sa vakayacora e dua na veiyalayalati kei Tamada Vakalomalagi. O yalataka mo muria na Nona ivakaro ka muri Jisu Karisito. Ni oti oya, ena veigauna kece o vakayagataka kina na sakaramede, sa rawa mo nanumi Jisu kei na sala e rawa ni vukei iko kina o Koya mo veivutuni.”

A waqa na matai Alexandre. “Ena rawa me’u vakila ni’u sa savasava me vaka na gauna au a papitaiso kina?”

“Okoya sara ga qori,” a kaya o Ta. “E kila tu na Tamada Vakalomalagi ni o sega ni uasivi sara, ka so na gauna o na digidigi cala kina. Ia ni o sa ivalavala ca, sa rawa mo veivutuni ka tovolea tikoga mo muri Jisu. O rogoca beka oqori me vaka e dua na ka o rawa ni cakava?”

A matadredredre o Alexandre. “Io! Au nanuma ni’u rawa ni cakava oqori.”

Ni qai yaco mai na siganisucu nei Alexandre, eratou a vakayagataka vakamatavuvale na nona keke ni siganisucu ni oti na vuli. E a maleka! Ia ena nona papitaiso, a vakila o Alexandre na lomavinaka levu sara ni sa lamata cake mai wai. A yalataka o koya me muri Jisu Karisito, ka vakila ni veivakurabuitaki dina!

Ena macawa oya a tovolea o Alexandre na nona vinaka duadua me maroroya na nona veiyalayalati vou ka dau yalovinaka vei tacina lailai. Ia ni yaco mai na Sigatabu ka tarava, a rarawa vakalailai o koya. A nanuma o koya ni a rawa ni cakava eso na digidigi vinaka cake ena macawa oya.

Ni sa votai mai na sakaramede, a roqoliga o Alexandre ka cuva sobu na uluna. A kerea lo me vukei koya na Tamada Vakalomalagi me vinaka cake ena macawa tarava. A vakasamataka na levu ni nona lomani koya o Jisu kei na nona vinakata me vakataki Koya vakalevu cake.

Ena nona taura e dua na tiki ni madrai mai na terea ni sakaramede, a vakila na veivakacegui e lomana. A vakila qo o koya me vaka ga ena siga ni nona papitaiso! A mokoti koya mai o Ta ka matadredredre vua.

Nikua sa itekivu ni dua na macawa vou, ka na saga o Alexandre ena nona igu taucoko—ena veivuke nei Tamada Vakalomalagi.

Droini mai vei Toby Newsome