Leqa ni iTokani

A caqeta o Matt e dua na vatu ni taubale i vale. A sega ni kila rawa o koya. Na cava sa rui lomaca kina o koya?

A dau vakailala voli o koya vata kei na nona itokani o Josefa. Ia a vaka me vucesa dina o Josefa, ka sa tini sara me lesu totolo ki vale o Matt mai na gauna e a navuca taumada.

Rairai au raitayaloyalotaka tiko, a nanuma o Matt. E rairai e dua beka ga na siga ca vei Josefa.

Ena siga ka tarava ni yaco ki koronivuli o Matt, a raici Josefa ni vosa tiko vei ira e dua na ilawalawa itokani. A kaci yani vua o Matt ka yaloyalo. A rai mai vei Matt o Josefa, ia a sega ni yaloyalo lesu mai. A vuki lesu ga vei ira na nona itokani.

A sega beka ga ni raici au o Josefa, a kaya vakaikoya o Matt.

Ena kalasi ni sa gauna ni cakacaka vakailawalawa, a lako yani o Matt vei Josefa. “O vinakata mo veitokani?” A taroga yani o Matt.

E vaka me sega mada ga ni rogoci koya mai o Josefa. “Lako mai, Mike,” a kaya o Josefa vua na gonetagane e dabe tikivi koya toka. “Daru lai cakacaka ki kea.”

Rau a mai lako yani na gonetagane e rua oqo. E a vakila o Matt ni bibi na ketena. E dua na ka a cudruvaka dina tiko o Josefa. Ia na cava?

A sega ni vakasamataka rawa o Matt e dua na ka a cakava me vakacudrui Josefa kina. E dina, ena so na gauna erau dau tiko ena timi veibasai ni tavipolo ena gauna ni vakacagicagi. Ia erau dau veitavi liga tu ga ni oti oya. Na cava e digitaka tiko kina o Josefa me dau tiko ena timi veibasai ena veika kecega?

Au rawa beka ga ni vosa vei Josefa ena gauna ni vakacagicagi, a vakasamataka o Matt.

Ena gauna ni vakacagicagi, a cici yani o Matt me laki tomani ira na vo ni gone ena rara.

“Ei, Josefa!” a kaci yani o Matt. “E rawa beka ni’u vosa vei iko me dua na miniti?”

“Sa vakarau me tekivu na qito,” a kaya o Josefa.

“Io, au na lako mai qito e yasamu ka na rawa ni daru veivosaki,” a kaya o Matt.

“Iko sa rui bera. E sega na vanua galala e yasaqu,” a kaya o Josefa ni cici yani ki na nona timi.

A mai vakararai tu yani o Matt ni ra sa tekivu qito kece. A sega vakadua ni dau kauwaitaka e liu o Josefa ni rui levu na tamata. Era dau ciqomi kecega na tamata.

Ia o Matt a vakakila dina ni sega ni ciqomi mai vei Josefa. Na cava na vuna a vaqo tiko kina o Josefa? Na cava a sega ni okati koya tiko kina? A sega ni cakava o Matt e dua na ka cala!

“O Josefa ga e cakava tiko e dua na ka cala,” a kaya o Matt vei rau na nona itubutubu ena gauna ni vakayakavi. “E sega mada ga ni vosa vei au me tukuna mai na ka e cudruvaka!”

“Oqori e vaka me dredre dina,” a kaya o Na.

A vakila o Matt na tonawanawa ni matana. “E vaka ni sa bese o koya me noqu itokani, ka’u sega ni kila na vuna.”

“Au dokai iko ena nomu tovolea mo vosa vua,” a kaya o Ta. “E rawa beka ni o tovolea mo tukuna vua na veika o vakila kei na nomu via veivuke.”

A vakacetaba o Matt. Na ivukivuki nei Josefa, a sega ni vakadeitaka rawa kina o koya ni na rogoci koya mada ga o Josefa.

A boboka na ligai Matt o Na. “Keirau na masulaki iko talega, kei Josefa.”

Ena bogi oya ni sa vakarau moce o Matt, a vakasamataka na veika rau a tukuna o Na kei Ta. A dau masulaki ira na nona itokani e liu o koya ni ra rarawa se sotava e dua na gauna dredre. Ia oqo e a duidui, donu? O Josefa ga a yaloca tiko vua.

Na cava na vuna me rau masulaki Josefa kina na itubutubu nei Matt? E dodonu beka me masulaki Josefa talega o koya?

A tekiduru ena yasa ni nona idavodavo o Matt. “Tamaqu Vakalomalagi, e dredre sara me’u kakua ni cudruvi Josefa,” a masulaka o Matt. “Au rawa ni raica ni cudru o koya, ia e sega ni tukuna vei au na ka e rarawataka.”

A cegu vakalailai o Matt. “Au vinakata me’u veivosaki kei koya, ia au sega ni kila rawa ni na tukuna vei au se cava e leqa. Yalovinaka vukei koya ena cava ga e vakararawataki koya tiko. Se cava ga e yaco, yalovinaka vukei au me’u yalovinaka tikoga vua.”

Ni masu tiko o Matt, a tekivu me vakila na vakacegu e lomana. A kila o koya ni Rau nona itokani vinaka duadua na Tamada Vakalomalagi kei Jisu Karisito. E rawa ni Rau vukei koya me lomani Josefa, veitalia na ka a digitaka o Josefa me cakava. Ka Rau na dau tu e kea vua kevaka sara mada ga e sega ni tiko o Josefa me nona itokani.

A matadredredre sara o Matt. Na masulaki Josefa a dua dina na vakasama vinaka mai na veika kece.

Droini mai vei Mark Robison