Ko ha Fepōtalanoaʻaki mo Paaka fekauʻaki mo e ʻAʻahi ki Palemailá

Fakamatala mai fekauʻaki mo koe.

ʻOku ou taʻu 9. ʻOku ʻi ai hoku kiʻi tuofefine taʻu tolu ko hono hingoá ko Metiline. Ko e meʻakai ʻoku ou saiʻia taha aí ko e pisa sīsí. Ko e lanu ʻoku ou saiʻia taha aí ko e lanu ʻuliʻulí. ʻOku ou saiʻia ke faʻu ha ngaahi talanoa, vaʻinga keimi, mo tā fakatātā.

Neongo naʻe momoko ʻi tuʻa, ka naʻá ku ongoʻi ha ongo māfana peá u ʻiloʻi naʻe haʻu ia mei he Laumālie Māʻoniʻoní. Naʻá ku fakakaukau ki he lotu ai ʻa Siosefa Sāmitá mo ʻene mamata ki he Tamai Hēvaní mo Sīsū Kalaisí. ʻOku ou ʻilo te u lava foki ʻo lotu, pea ʻe tali mai ia ʻe heʻeku Tamai Hēvaní.

Hili e Vaoʻakau Tapú, ne mau ʻaʻahi ki he Moʻunga ko Komolá. Ko e Moʻunga ko Komolá ʻa e feituʻu naʻe tanu ai ʻe Molonai ʻa e ʻū lauʻi peleti koulá ke toki maʻu ia ʻe Siosefa Sāmita ʻi he ngaahi taʻu kimui angé. Naʻa mau ō foki ki ha ngaahi feituʻu fakahisitōlia kehe ʻo e Siasí ʻa ia ne mau ako lahi ange ai ki hono liliu ʻo e Tohi ʻa Molomoná.

Naʻe tokoniʻi fēfē koe ʻe he ako lahi ange fekauʻaki mo e moʻui ʻa Siosefa Sāmitá?

Naʻá ku ʻiloʻi naʻe ʻikai lahi e ako ʻa Siosefá. Naʻe faingataʻa kiate au ke u ako ke u laukonga. Naʻá ku fakakaukau mo ʻeku fineʻeikí te u lau fakaʻaho ha veesi mei he Tohi ʻa Molomoná pea te ma lotu ke tokoniʻi au ʻe he Tamai Hēvaní ke u ako ke laukonga. Kuo fakaʻau ke lelei ʻaupito ange ʻeku laukongá! ʻOku ou ʻilo ko e taimi ʻoku tau lotu ai mo kole ha tokoní, ʻo hangē pē ko Siosefá, ʻe tali mai ʻe heʻetau Tamai Hēvaní.

ʻOku ou kei ngāue mālohi pē ke maʻu haʻaku fakamoʻoni pē ʻaʻaku. ʻOku ou saiʻia ʻi heʻeku faitatau mo Siosefa Sāmitá. ʻI hono taʻu 14, naʻe ʻikai foki ke ne fuʻu fakapapauʻi e meʻa naʻe moʻoní. ʻOku ou lotua he pongipongi kotoa pē ʻe vavé ni pē haʻaku maʻu ha fakamoʻoni hangē ko ʻene fakamoʻoní. ʻOku ou ʻiloʻi ʻoku ngaohi au ʻe he Tohi ʻa Molomoná ke u ongoʻi fiemālie ʻi hoku lotó ʻi he taimi ʻoku ou lau ai iá, pea ʻoku lava ke u ongoʻi ʻa e ʻofa ʻa hoku Fakamoʻuí kiate aú.