“ʻŪ Mohenga Pēpē ki he Kilisimasí,” Ko e Kaumeʻá, Tīsema 2025, 30–31.
ʻŪ Mohenga Pēpē ki he Kilisimasí
“ʻOkú ke pehē ko e hā e meʻa lelei taha ʻo e Kilisimasí?” Ko e fehuʻi ange ia ʻa Tetí.
Ko ha talanoa moʻoni mei Kānata.
Pākakihi, pākakihi, pākakihi.
Naʻe pākakihi leʻosiʻi e sū ʻo Keití ʻi he sinoú ʻi heʻene lue atu ki he fale ngāué. ʻI heʻene fakaava hake e matapaá, naʻe haʻu e nanamu angamaheni ʻo e loló mei he palau naʻe fakaleleiʻi ʻe heʻene tangataʻeikí.
“ʻOku fēfē hake ʻeku Keití?” Ko e fehuʻi ange ia ʻa Teti ʻi heʻene hū ki lotó.
“ʻOku ou fuʻu mokosia!” Naʻá ne fakapatū ke ngangana e sinoú mei hono putí. “Ko e hā e meʻa ʻokú ke ngaohí?”
Naʻá ne tafoki ki heʻene tēpile ngāué. Naʻe movete takai ha fanga kiʻi meʻi papa ʻi ha kiʻi mohenga ki he tamapuá. Naʻe mihi loloa ʻe Keiti ʻene mānavá. Ko ha ngaohi nai ia maʻana? Mahalo pē ko e meʻa ia maʻa hono kiʻi tehina, ko Sēiní.
Ne talaange ʻe Keiti, “ʻOku fakaʻofoʻofa ʻaupito. Ko e ʻai ia maʻa Sēini?”
Naʻe kalokalo ʻikai ange ʻa Teti. “ʻOkú ke manatuʻi ʻa Misa Uloi, ʻa e tangata naʻe ngāue mo kitautolu lolotonga e taimi ututaʻú?”
Naʻe kamokamo pē ʻa Keiti.
Naʻe talaange ʻe Teti, “Naʻá ne maʻu mo hono fāmilí ha fale ke nau nofo totongi ai, ka ʻoku nau foua ha taimi faingataʻa. ʻOkú ne hohaʻa he ʻikai maʻu ʻe heʻene fānau fefine ʻe toko tolú ha Kilisimasi lelei he taʻú ni. Ka ʻoku ou maʻu mo hoʻo faʻeé ha ʻū meʻaʻofa makehe maʻanautolu.”
Naʻe lue atu ʻa Keiti ki he kiʻi mohengá ʻo sālueʻi mo ueʻi hki he ongo tafaʻakí.
Naʻe malimali ʻa Teti. “Kapau ko ha kiʻi taʻahine siʻisiʻi koe, te ke saiʻia nai ʻi he kiʻi mohenga ko ʻení?”
Naʻá ne kata. “Ko e kiʻi taʻahine siʻisiʻi au!”
Naʻe toki ʻiloʻi leva ʻe Keiti e tokotaha ne ngaohi ki ai e kiʻi mohengá. Naʻe ngaohi ia maʻá e ngaahi ʻofefine ʻo Misa Uloí!
“ʻE lava ke u tokoni atu?”
Naʻe talaange ʻe Teti, “Te ke lava ʻo tokoni mai ki hono valí.” Naʻá ne fofonga fiefia.
Naʻe ngaohi ʻe Teti ha fanga kiʻi mohenga ʻe tolu, ko e taha maʻá e kiʻi taʻahine takitaha. Naʻá ne fakaava ha ʻū kapa vali, pea ngāue leva ʻa Keiti. Naʻá ne vali kinautolu ʻaki ha lanu pingikī vaivai, pulū vaivai, mo engeenga maama. ʻI he foʻi tohoʻi kotoa pē ʻo ʻene polosí, naʻá ne ongoʻi fiefia ange.
Naʻá ne tafoki hake ki heʻene tangataʻeikí. “ʻI heʻeku sio ki he kiʻi mohenga ʻuluakí, naʻá ku fakaʻamu ko ha meʻa ia maʻaku. Ka ʻoku fakafiefia ʻaupito ʻa e tokoní. ʻOku ou fakaʻamu pē ʻe saiʻia ʻa e tamaiki fefiné ʻi he fanga kiʻi mohengá ʻo hangē ko ʻeku saiʻia ʻi hono vali kinautolú.”
ʻI he Efiafi Kimuʻa ʻi he Kilisimasí, naʻe ʻalu ʻa Keiti mo hono fāmilí ki he ʻapi ʻo e fāmili Uloí.
Tuki, tuki, tuki. Naʻe tukituki atu ʻa Keiti ʻi he matapaá mo tatali. ʻI he ava hake ʻa e matapaá, naʻá ne sio ki ha kiʻi taʻahine ʻulu kelo-hinehina ʻokú na meimei toʻu mo hano kofu manifinifi lanu engeenga. Naʻe fakasiosio mai mei hono tafaʻakí ha ongo tamaiki fefine iiki ange.
Hili ha momeniti siʻi mei ai, ne ʻasi mai foki mo Mīsisi Uloi ʻi he matapaá.
Naʻe pehē ange ʻe Mami, “Kilisimasi Fiefia!”
Naʻe toʻo mai ʻe Keiti mo hono fāmilí ʻa e fanga kiʻi mohengá, fanga kiʻi tamapua kuo kofukofuʻi ʻe tolu, mo ha puha lahi ne fonu ʻi he meʻakai faka-Kilisimasí. Ne sio pē ʻa Mīsisi Uloi, mo e loʻimataʻia hono fofongá ʻi he fili ʻe he tamaiki fefine takitaha ha kiʻi mohengá. Naʻe māmālie pē e ʻikai toe mā ʻa e fānau fefiné. ʻI heʻenau fofonga ofo mo fiefiá, naʻa nau takatakaiʻi ʻenau fanga kiʻi pēpē tamapua foʻoú ʻaki e ʻū kafu vavae naʻe ngaohi ʻe he faʻē ʻa Keití.
Naʻe tangutu ʻa Keiti ʻi he tafaʻaki ʻo e kiʻi taʻahine lahi tahá. “Ko hai ho hingoá?”
Naʻe talaange he kiʻi taʻahiné, “Folosi.”
“Ko Keiti au. ʻOkú ke saiʻia ʻi he kiʻi mohenga pēpeé?” ko e fehuʻi ange ia ʻa Keití.
Naʻe malimali fiefia ʻa Folosi. “Ko e meʻa fakaʻofoʻofa taha ia kuó u maʻú.”
“ʻOku ou fiefia ʻi hoʻo saiʻia aí. Naʻá ku tokoni ʻi hono vali iá!”
Naʻá ne fanafana ange ʻi heʻene fāʻofua kia Keití, “Mālō.”
Naʻe tāpuniʻi ʻe Teti ʻa e matapaá ʻi heʻenau mavahe mei he ʻapi ʻo e fāmili Uloí. Naʻá ne kiʻi kukuʻi e uma ʻo Keití. “ʻOkú ke pehē ko e hā e meʻa lelei taha ʻo e Kilisimasí?”
Naʻe sio hake ʻa Keiti ki heʻene tangataʻeikí mo malimali. “Naʻá ku faʻa fakakaukau ko e maʻu ha meʻaʻofá, ka ʻi he taimí ni ʻoku ou pehē mahalo ko hono foaki ha meʻaʻofa ki ha taha kehé.”
Tā fakatātā ʻa Melissa Manwill Kashiwagi