Ko Hono Tauhi ʻo e Kilisimasí ʻi Hono Lotó

“Ko e hā e ʻuhinga ʻoku ʻikai ke tau toe ō ai ki he lotú?”

Kuo tuʻo lahi hono ʻeke ʻe Seitī ki heʻene mātuʻá ʻa e fehuʻi ko ʻení. Naʻe faʻa kalokalo ange pē ʻene faʻeé mo ne fōtunga meimei loto-mamahi ʻo hangē ko ia ne ongoʻi ʻe Seitií. Faifai peá ne faʻa pehē ange, “ʻOku lahi e ngaahi ʻuhingá.” Naʻe ʻikai mahino kia Seitī.

Kimuʻa pea ʻikai toe ʻalu hono fāmilí ki he lotú, naʻe fakaʻatā ia ʻe heʻene ongomātuʻá ke ne papitaiso. Naʻe fiefia ai ʻa Seitī, ka naʻá ne fakaʻamu ʻe ʻave ia ʻe heʻene ongomātuʻá ki he lotú neongo kapau he ʻikai ke na fie nofo ai. Naʻá ne fakaʻamu ʻaupito ke ne ʻalu ki he Palaimelí.

Naʻe kei fakahoko fakataha pē ʻe hono fāmilí ha ngaahi meʻa fakafiefia. ʻI he faʻahitaʻu fakatōlaú, naʻa nau fononga lalo ʻi he ʻotu moʻungá. Naʻa nau kaimeʻakai ʻi he paʻaké mo vaʻinga tolo mo hapo (frisbee). Naʻa nau ō ki he tulama naʻe kau ai hono tuongaʻane lahí.

Naʻá ne ʻave mo hono fāmilí ʻi Tīsema ha ʻū lauʻi peleti fakaneifua ki honau ngaahi kaungāmeʻá mo e kaungāʻapí. Naʻa nau teuteuʻi fakataha ʻa e fuʻu ʻakau Kilisimasí. Naʻa nau fakaʻaongaʻi ha ʻaho Tokonaki ke fakapaheke ʻi he sinoú pea naʻa nau foki mai ki ʻapi mo ha inu sokoleti mafana mo ha ngaahi foʻi tōnati ne ngaohi ʻi ʻapi.

Naʻe saiʻia ʻa Seitī ʻi hono fai ʻo e ngaahi meʻá ni, ka naʻá ne toe fakaʻamu lahi ange ke ne ʻalu ki he lotú. Naʻá ne fakaʻamu ke hivaʻi ha ngaahi himi Kilisimasi mo fanongo ki he ngaahi lea fekauʻaki mo hono ʻaloʻi ʻo Sīsū Kalaisí.

Ko e Kilisimasi ʻo e taʻu ní naʻe hoko ia ʻi he ʻaho Sāpaté. Naʻe talaange ʻe hono kaungāmeʻá ʻoku hiva ʻa e Palaimelí ʻi he houalotu sākalamēnití ʻi he pongipongi Kilisimasí. Naʻe manako ʻa Seitī ke hiva.

“ʻE lava nai ke tau ō ki he lotú ʻi he Sāpate pē ko ʻení?” Ko e kole ange ia ʻa Seitī ki heʻene ongomātuʻá. “Fakamolemole? ʻOku hiva ʻa e Palaimelí, pea ʻoku ou fie kau ki ai.”

Naʻe fesiofaki ʻene ongomātuʻá, peá na toe sio kia Seitī. Naʻe talaange ʻe Teti, “Fakamolemole, ka he ʻikai ke tau lava. ʻIkai ko e taʻú ni.”

Naʻe hoko atu pē e ʻamanaki ʻa Seitī ʻe lava hono fāmilí ʻo foki ki he lotú ʻi ha ʻahó, ka naʻe ʻikai tokoni ia ki ai ʻi he Kilisimasi ko ʻení.

ʻI he pongipongi Kilisimasí, naʻe ongoʻi ʻe Seitī ʻa e fiefia ʻo e fakatahataha mai ki he fuʻu ʻakau Kilisimasí mo fakaava e ʻū meʻaʻofá mo hono fāmilí. Naʻá ne fakakaukau ki he lahi ʻo ʻene ʻofa ʻi heʻene ongomātuʻá mo hono tuongaʻane lahí peá ne ʻiloʻi naʻa nau ʻofa ʻiate ia.

Naʻe ngaohi ʻe Mami ʻa e meʻatokoni pongipongi naʻa nau saiʻia taha aí—ʻa e laʻikeke sokoletí mo e kilimi matolu ʻaupitó. Naʻe pehē ange ʻe hono tuongaʻané hili haʻane kai ha peleti kakato ʻe ua, “Ko e meʻatokoni pongipongi lelei tahá eni.” Naʻe fakakaukau tatau ʻa e tokotaha kotoa pē.

Hili ʻene tokoni ke fakamaʻá, naʻe ʻalu ʻa Seitī ki hono lokí. Naʻá ne fakakaukau ki he hiva ʻa e fānau Palaimelí ʻi he lotú mo fai hono lelei tahá ke ʻoua naʻa loto-mamahi ʻi he ʻikai ke ne ʻi aí.

Naʻe sio takai ʻa Seitī ʻi hono lokí ki ha meʻa ke fai. Naʻá ne sio ki ha puha peni valivali lanu kehekehe. Fakafokifā pē kuó ne maʻu ha foʻi fakakaukau. Neongo kapau he ʻikai ke ne lava ʻo ʻalu ki he lotú ʻi he taimí ni, kae mahalo te ne kei lava pē ʻo ʻomi ʻa Sīsū ki hono ʻahó.

Naʻá ne maʻu ha laʻipepa pea kamata ke ne tā ha fakatātā ʻo e ʻAloʻí—ʻa e pēpē ko Sīsuú ʻi he ʻaiʻangakai ʻo e manú, ko Mele mo Siosefa ʻokú na tokangaʻi ia, pea naʻe haʻohaʻo takai ʻa e kau tauhisipí ʻiate kinautolu kotoa. Naʻá ne hivaʻi kiate ia pē ʻa e “Naʻe ʻAloʻi Mai ʻa Sīsū Kalaisí” ʻi he lolotonga ʻene tā fakatātaá.

ʻI he ʻosi ʻene fakatātaá, naʻá ne ʻave ia ki peito ʻo ne fakaʻaongaʻi ha makinito ke fokotuʻu ia ʻi he matapā e ʻaisí. Naʻe ʻikai ke lea ʻene ongomātuʻá mo hono tuongaʻane lahí, ka naʻa nau malimali.

Na‘e ongoʻi lelei ʻa Seitī. Naʻe ʻikai ke ne lava ʻo liliu ʻa e ongo naʻe maʻu ʻe hono fāmilí fekauʻaki mo e ʻalu ki he lotú. Ka te ne kei lava pē ʻo tauhi ʻa Kalaisi mo e Kilisimasí ʻi hono lotó.

Tā fakatātā ʻa Tracy Nishimura Bishop