Ngaahi Fakakaukau ʻe 7 ki ha Kilisimasi Fakafāmili Fiefia

1. ʻŪ Meʻaʻofa maʻa Sīsū

Naʻe fakaafeʻi kitautolu ʻe Sīsū Kalaisi ke hiki hake ʻetau māmá—ko Ia! (Vakai, 3 Nīfai 18:24.) Te tau lava ʻo fai ia ʻaki ʻetau tokoni, ʻofa, mo ngāue ʻi Heʻene foungá. Fakakaukau ki ha founga te ke lava ai ʻo tokoniʻi e niʻihi kehé ke nau aʻusia ʻEne māmá. (Vakai ki he peesi 20 ki ha ngaahi fakakaukau!) Hiki pe tā hoʻo fakakaukaú pea fokotuʻu ia ʻi ha feituʻu te ke lava ʻo sio ki aí, ʻo hangē ko hoʻo fuʻu ʻakau Kilisimasí. Fakaʻaongaʻi ha ngaahi ʻaho kimuʻa ʻi he Kilisimasí ke fakamaama ʻa e māmaní ʻo hangē ko ia naʻe fai ʻe Sīsuú!

2. Ngaahi Maama ʻo e Matapā Sioʻatá

ʻI ʻAilani, ʻoku faʻo ʻe ha ngaahi fāmili ʻe niʻihi ha ngaahi foʻi teʻelango ʻi honau matapā sioʻatá ke fakataipe hono talitali lelei ʻo Mele, Siosefa, mo e pēpē ko Sīsuú ki honau ʻapí. Tuku ha maama ʻi hoʻomou matapā sioʻatá pe ʻi ha feituʻu kehe ʻi homou falé ke talitali lelei ʻa Sīsū Kalaisi mo ha taha pē ʻoku ʻaʻahi atu kiate kimoutolu.

3. ʻAiʻangakai ʻo e Ngāue Tokoní

Ngaohi pe kumi ha puha ke fakafofongaʻi ʻa e ʻaiʻangakai ʻo e manú naʻe mohe ai ʻa e pēpē ko Sīsuú. Ko e taimi kotoa pē ʻokú ke tokoniʻi ai ha taha (pe sio ki ha taha kehe ʻoku ngāue tokoni), faʻo ha kiʻi afo, pepa, pe mohuku ʻi he ʻaiʻangakai ʻo e manú ke molū ia Maʻana. Ke fakafiefia angé, fakahoko fakapulipuli hoʻo ngāue tokoní!

4. Sio Fetuʻu

ʻI Pōlani, ʻoku tatali ha ngaahi fāmili ʻe niʻihi ki he ʻuluaki fetuʻú ke ʻasi mai kimuʻa pea fai e maʻu meʻatokoni efiafi ʻi he Efiafi kimuʻa he Kilisimasí. Kumi ha pō tafitonga ke ke mamata ai ki he langí mo manatuʻi ʻa e fetuʻu naʻe hā ʻi he taimi naʻe ʻaloʻi ai ʻa Sīsū Kalaisí. Pe kapau ʻoku ʻikai ke ke lava ʻo sio ki he ngaahi fetuʻú, tā haʻo ngaahi foʻi fetuʻu pē ʻaʻau pea tautau kinautolu!

5. ʻŪ Kaati Ngaohí

Tohi, teuteuʻi, mo ʻave ha kiʻi tohi ki ha taha ʻokú ne fiemaʻu ha kiʻi ʻofa lahi ange ʻi he Kilisimasi ko ʻení. (Kiʻi tokoni: ʻOku fiemaʻu ʻe he meimei tokotaha kotoa pē ha ʻofa lahi ange! ʻOku ʻikai hano ngataʻanga ʻo e ngaahi faingamālié.)

6. Teuteuʻi ʻa e Ngaahi Holó

Fakaʻaongaʻi ha ngaahi meʻa ʻi homou falé ke ngaohi ʻaki ha ʻū meʻa teuteu Kilisimasi. Te ke lava ʻo ngaohi ha ʻū sinoufeleiki pepa (ʻoku sinou ha ngaahi feituʻu ʻe niʻihiʻi he taimi Kilisimasí), ngaahi foʻi maka kuo vali, sēini pepa, kahoa popikoane—ha faʻahinga meʻa pē! Vakaiʻi ʻa e talanoa ʻo Sipenisaá ʻi he peesi 4 mo e talanoa ʻo Seití ʻi he peesi 36 ke ʻiloʻi pe ko e hā ʻa e ʻū meʻa teuteu naʻá na faʻú.

7. Fakafetongi Tukufakaholo ʻa Māmaní

Kumi mo ho fāmilí ʻa e ngaahi tukufakaholo faka-Kilisimasi ʻi he ʻinitanetí mei ha fonua kehe. ʻAhiʻahiʻi ha niʻihi! Mahalo te nau fakaʻohovaleʻi koe.