Ko Hono Tuku ke Ulo Atu ʻEtau Māmá

Naʻa mau ako ʻi he efiafi fakafāmili ʻi ʻapí ki he founga te mau lava ai ʻo fakaʻaongaʻi homau ngaahi talēnití ke tāpuekina e niʻihi kehé mo tokoni ke nau ongoʻi e ʻofa ʻa e ʻOtuá. ʻOku mau laukonga fekauʻaki mo hono akoʻi ʻe Sīsū ʻa e kakaí ʻoku totonu ke nau vahevahe ʻenau māmá kae ʻikai fūfuuʻi ia. Naʻa mau talanoa leva ki ha ngaahi founga te mau lava ai ʻo vahevahe ʻemau māmá ʻo fakafou ʻi homau ngaahi talēnití.

Naʻe fokotuʻu mai ʻe heʻema faʻeé ke ma tā ʻema ngaahi meʻaleá maʻá e kakai ʻi ha ʻapi ki he kau toulekeleká ofi mai pē kiate kimautolu. Naʻá ma fiefia ʻi he kamatá. Ka ʻi heʻemau aʻu ki he ʻapi ki he kau toulekeleká, ne ma ongoʻi manavasiʻi. Naʻá ma toe ongoʻi ilifia ange ʻi heʻema hū atu ki he loki ne ʻamanaki ke ma fakaʻaliʻali aí.

Ka ʻi heʻema kamata tā ʻema meʻaleá, naʻá ma ongoʻi nonga. Naʻe tātaaʻi ʻe he kakaí honau vaʻé mo hiva fakataha ki heʻema ngaahi hivá. Naʻá ma fiefia he tā meʻaleá, pea naʻá ma ongoʻi fiefia ʻi heʻema sio ki he malimali mei honau fofongá.

Talu mei ai, mo ʻema tā ʻi ha ngaahi ʻapi kehe ki he kau toulekeleká, pea ʻokú ma loto ke hokohoko atu hono fai iá. ʻOku fiemaʻu ha taimi lahi mo ha ngāue lahi ki hono tā ʻo ha meʻalea fakamūsika, ka ʻokú ma ʻiloʻi ʻoku laukau ʻaki kimaua ʻe he Tamai Hēvaní ʻi hono fakatupulaki homa ngaahi talēnití mo vahevahe ia mo e niʻihi kehé.

Tā fakatātaaʻi ʻe Tania Rex