15,100 ug Lapas pa

Sa dihang nag-otso anyos ko, igo na ang akong pangidaron aron makaangkon og akong kaugalingong account sa FamilySearch! Sa sinugdanan nakulbaan ko, apan ang akong mga ginikanan ug mga igsoon mitudlo nako kon unsaon sa pag-indeks ug sa paghimo sa akong family tree aron akong matabangan ang akong mga katigulangan. Human niana, wala na ko makulbai. Gibati nako nga suportado ug andam.

Dayon gibati nako ang tinguha nga mahimong tigrebyo sa family history sama sa akong mga ginikanan ug mga igsoon. Ako mipili niana nga mahimong usa sa akong mga tumong alang sa programa sa Kabataan ug Kabatan-onan. Sa pagkab-ot niini nga tumong, kinahanglan ko nga mo-indeks og 1,000 ka rekord.

Usahay gibati nako nga nabug-atan. Apan ang akong mga ginikanan mipahinumdom nako nga dili nako kini buhaton sa usa lang ka adlaw. Kondili, kinahanglan nakong tutokan ang pagbuhat og tulo lang ka rekord sa usa ka adlaw, ug dili dangtan og usa ka tuig makab-ot na nako ang akong tumong. Miingon sila nga kon maglisod ko sa pagsabot sa mga imahe, tabangan ko nila.

Nag-ampo ko sa Langitnong Amahan nga tabangan ko Niya nga makab-ot ang akong tumong. Mas nindot ang akong gibati human sa akong pag-ampo.

Wala ko mohunong ug mipadayon sa pag-indeks matag adlaw. Human sa usa ka tuig, sa wala pa ko mag-edad og nuybe, naka-indeks na ko og sobra sa 1,000 ka rekord ug gihatagan og posisyon nga tigrebyo. Naghinamhinam kaayo ko!

Karon kanunay ko nga mokuyog sa akong mga ginikanan ngadto sa Trujillo Peru Temple. Motabang ko sa pagprinta sa mga kard sa ordinansa, guntingon kini, ug ihatag kini ngadto sa matag sakop sa pamilya aron ilang mapahigayon ang mga ordinansa samtang maghulat ko ngadto sa mga tanaman sa templo. Sa dili madugay makasulod na ko aron mohimo og mga pagbunyag.

Ako karon 10 anyos na ug naka-indeks na og 15,100 ka rekord! Malipayon kaayo ko ug naghinam-hinam nga magpadayon sa pagkab-ot sa akong mga tumong nga mas mahisama ni Jesukristo.

Mga paghulagway pinaagi ni Parker Nielsen