“Ang Kataposang Bolabola,” Higala, Nobiyembre 2025, 18–19.

Ang Kataposang Bolabola

Ni Savannah L. Tanner

Dili patas! Walay nakigbahin ni Alex!

Usa ka tinuod nga istorya gikan sa USA.

Tulo ka batang lalaki nga nagtinan-away sa usag usa ug sa usa ka bolabola sa nga anaa sa tinidor

Si Alex mikanaog sa hagdanan ug nanghupaw og lawom.

Si Mama mihangad gikan nga nagtan-aw sa iyang libro. “Unsay problema?”

“Walay makigbahin nako!” Miingon si Alex. “Dili ko ganahan nga tunga-tunga ko nga anak.” Ang mga igsoong lalaki ni Alex kanunay nga makadawat sa unsay ilang gusto. Dili kini patas.

“Segurado ko nga kon ikaw mohangyo og tarong, ang imong mga igsoong lalaki makigbahin nimo,” miingon si Mama.

Mikusmod si Alex. “Mihangyo ko og tarong!”

“Unsa kaha kon mogamit ka og timer? Niana nga paagi matag usa ninyo makakuha og sama nga gidugayon sa oras sa pagdula.”

“Naggamit ko og timer!” Miingon si Alex. “Apan tingali mogamit ko og duha ka timer aron mas segurado.” Gikuha niya ang laing timer gikan sa counter sa kusina ug misaka sa hagdanan. Ang iyang manghod, si David, nagdula diha sa TV.

“Miingon si Mama nga makigbahin ka,” miingon si Alex. Iyang gi-set ang timer ngadto sa lima ka minuto. “Kon mobagting na kini, turno na nako.”

Pagkasunod adlaw, sa dihang si Alex ug ang iyang magulang, si Jake, parehong gusto nga magdula, ilang i-set ang timer sulod sa 30 minutos matag usa. Sa dihang si David ug si Jake parehong nagdula og mga bloke, ihapon nila nga magparehas gayod ang gidaghanon sa matag usa ka tawo. Ug sa higayon nga si David ug si Alex parehong ganahan og chocolate chip cookie, tungaon nila kini sa eksaktong pagkatunga. Ang mga butang sa kataposan mabati na nga patas.

Apan miabot ang panihapon …

Nianang gabhiona, spaghetti ug bolabola ang kaunon nila! Si Jake misugod sa pagbutang og pasta sa iyang plato bisan kon si Alex wala pa gani makakuha og kutsara.

“Hoy, dili patas,” miingon si Alex. “Gigutom sab ko!”

Giagbayan siya ni Papa. “Alex, adunay daghang pagkaon alang sa tanan. Tan-awa, kuhaan ka nako og sama nga gidaghanon sa kang Jake.” Si Papa mibutang og pasta sa plato ni Alex.

Human nila napanalanginan ang pagkaon, ang tanan misugod na sa pagpangaon. Sa dihang nahurot na ni Alex ang iyang pagkaon, gigutom pa gihapon siya. Gili-li niya ang kaldero nga anaa sa tunga sa lamesa. Adunay usa nga kataposang bolabola sa ibabaw sa pasta. Iya kining gikutsara paingon sa iyang plato.

“Dili patas!” Miingon si David. “Mao ra na ang kataposan.”

Si Jake mitudlo usab sa bolabola gamit ang iyang tinidor. “Ganahan pod ko. Bahinon nato ni.”

“Bahinon?” Miingon si Alex. “Alang natong tulo? Apan gamay ra kaayo ni.”

Mitando si Jake ug si David. “Mao kana ang patas.”

Gikuha ni Jake ang plato ni Alex ug mainampingong mibahin sa bolabola sa tulo ka bahin. Nagtan-aw si Alex samtang ang bolabola nag-anam og ka gamay.

Mikatawa si Mama. “Gagmay na kaayo na nga mga piraso!”

Mikatawa usab si Papa. “Wala kinahanglana nga sa kanunay patas gayod sa eksaktong paagi,” miingon siya. “Tingali maningkamot kita nga mahimong mas maayo sa pagpakigbahin sa atong mga butang imbes nga bahinon ang tanang butang.”

Si Alex mitan-aw sa gagmayng piraso sa bolabola. Murag binuang kadto. Ingon ba gayod niana ang iyang pagbati mahitungod sa bolabola? Basin kinahanglan siyang magkat-on sa pagpakigbahin og mas daghan pa.

Pagkasunod adlaw, sa dihang si Jake ug si Alex parehong ganahan nga magdula og mga bloke, nakadesisyon sila nga maghimo og usa ka butang nga magkauban. Sa dihang si David ug si Jake didto na sa gawas, gipapuli sila ni Alex sa pagsakay sa iyang bisikleta. Ug dihang ang tanan gustong magdula og game sa TV, si Alex dili na mogamit og mga timer. Ang pagpakigbahin ug ang pagkamabination mas nindot gayod nga pamation kaysa magkaparehas gayod.

Nianang gabhiona, sa dihang si Jake ug si Alex parehong ganahan sa bolabola atol sa panihapon, miingon si Alex kang Jake nga iyaha na lang ang tibuok.

“Salamat!” Si Jake mikidhat. “Segurado ka ba nga dili ka gusto nga bahinon og katulo?”

Nagkinataw-anay si David ug si Alex. “Dili gyod!”