“Andam na nga Mopadayon sa Pagtubo,” Higala, Nobiyembre 2025, 36–37.
Andam na nga Mopadayon sa Pagtubo
Si Jewel dili ganahan nga mobiya sa iyang mga higala sa Primary!
Usa ka tinuod nga istorya gikan sa Palau.
Si Jewel milingkod sa lingkoranan sa panagtigom alang sa sakramento uban sa iyang mga ginikanan ug igsoong lalaki. Nagdrowing siya og mga hulagway sa mga istorya sa kasulatan. Naningkamot siya sa pagpaminaw sa mamumulong, apan hilabihan ang iyang gibati nga kakulba!
Karon mao ang unang adlaw ni Jewel nga moadto sa klase sa Young Women imbes sa Primary. Dili siya ganahan nga mobiya sa iyang mga higala sa Primary. Ganahan siya mokanta ug magbasa sa mga kasulatan uban nila.
Apan si Jewel mag-12 anyos na karong tuiga. Panahon na nga mobalhin ngadto sa programa sa Young Women.
Gipiyong ni Jewel ang iyang mga mata ug mihimo og hilom nga pag-ampo. Langitnong Amahan, palihog tabangi ko nga makabaton og maayo nga klase sa Young Women.
Human sa panapos nga pag-ampo sa panagtigom alang sa sakramento, si Jewel miginhawa og lawom ug milakaw paingon sa lawak nga klasehanan. Ang mas magulang nga mga batan-ong babaye anaa na didto. Upat sila kabuok. Nag-istoryahanay sila ug nagkinataw-anay.
“Kumusta,” miingon si Jewel.
Mipahiyom sila. “Kumusta.”
Ang magtutudlo misulod ug mi-welcome ni Jewel. Dayon iyang gisugdan ang leksiyon.
Sa kadaghanan diha sa klase, si Jewel mibati nga nag-inusara. Nakulbaan siya nga moistorya kay wala pa siya makaila sa ubang mga babaye. Manaa siya sa Young Women sulod sa taas nga panahon. Mura kini og hangtod sa hangtod! Kanunay ba siyang mobati nga nag-inusara dinhi?
Dayon ang gamay nga tingog misulod sa iyang hunahuna. Dili ka hangtod sa hangtod diha sa Young Women. Igo na ang imong pangidaron aron mobalhin ug magkat-on pa og dugang mahitungod sa pagkahimong disipulo ni Jesukristo.
Si Jewel mibati og kahupayan sa mga pulong. Giila niya kini isip ang Espiritu Santo nga nagtabang niya. Bisan kon siya wala pay daghang higala sa Young Women, wala siya mag-inusara. Anaa kaniya ang Espiritu Santo.
Pagkahuman sa klase, nakita ni Jewel ang iyang pamilya.
“Kumusta ang klase sa Young Women?” Nangutana si Mama.
Si Jewel migakos niya. “OK ra. Gimingaw ko sa Primary, ug wala pa ko kaila sa mga batan-ong babaye. Apan gibati nako ang Espiritu Santo nga naghupay nako.”
Mipahiyom si Mama. “Maayo kana! Ug basin sa sunod higayon mas momaayo pa.”
Mitando si Jewel. Nanghinaot siya nga husto si Mama.
Pagkasunod higayon nga siya miadto sa klase sa Young Women, si Jewel nangumusta na usab sa mga batan-ong babaye.
“Kumusta, Jewel,” ang usa miingon. “Dali magtupad ta!”
Mipahiyom si Jewel ug milingkod tupad sa batang babaye. Ang iyang ngalan si Ellie. Daghan sila og giistoryahan sa wala pa magsugod ang klase. Si Ellie mabination ug mipabati niya nga giabiabi.
Atol sa leksiyon, ang magtutudlo nangutana sa tanan kon sila duna bay kasinatian uban sa Espiritu Santo.
Si Jewel miisa sa iyang kamot. “Gibati nako ang Espiritu Santo nga mitabang nako sa dihang nakuyawan ko nga moapil sa Young Women,” siya miingon. “Ang Espiritu Santo motabang nako sa higayon nga ako motubo ug mag-atubang og mga hagit.”
Si Jewel naghunahuna kon giunsa siya paghupay sa Espiritu Santo sa dihang mibati siya nga nag-inusara. Nindot ang iyang gibati nga mopakigbahin sa iyang mga kasinatian ngadto sa mga batan-ong babaye sa Young Women.
Human sa iyang pagpakigbahin, pipila sa ubang mga batan-ong babaye mipakigbahin usab. Ganahan si Jewel nga naminaw sa unsay ilang gisulti.
Mingawon gihapon si Jewel sa Primary usahay. Apan tungod sa Espiritu Santo, andam na siya nga mopadayon sa pagtubo.
Paghulagway pinaagi ni Liz Brizzi