“Ang Pagpili ni Logan sa Ikapulo,” Higala, Nobiyembre 2025, 8–9.
Ang Pagpili ni Logan sa Ikapulo
“Andam ka ba nga motuman sa sugo nga mobayad sa ikapulo?” Nangutana si Mama.
Usa ka tinuod nga istorya gikan sa USA.
Sa dihang si Logan nag-edad og singko, naghunahuna siya nga ang ikapulo dili maayo nga ideya!
Atol sa home evening, si Mama nagbutang og 10 ka dolyar sa lamesa. “Ingnon ta lang nga kamo adunay kinitaan nga 10 ka dolyar.”
Mipahiyom si Logan. “OK!”
“Ang ikapulo mao ang ika-10 ka posyento. Mao nga mohatag kamo og usa ka dolyar ngadto sa Simbahan sa Ginoo.” Giisbog ni Mama ang usa ka dolyar palayo sa pundok.
Si Logan mikusmod. “Ihatag ang usa ka dolyar? Apan gusto kong motipig sa tanan nakong kwarta!”
“Basin mausab ang imong gibati kon modako na ka,” miingon si Mama. “Ang Langitnong Amahan mipanalangin kanato sa tanang butang. Ang pagbayad sa ikapulo mao ang usa ka paagi nga atong ikapakita sa Dios nga kita nahigugma Kaniya ug mapasalamaton sa Iyang mga panalangin.”
Sa dihang si Logan nag-edad og sayis, ang iyang mga magtutudlo sa Primary mitudlo niya nga ang ikapulo gamiton sa pagtukod og mga templo. Si Logan ganahan og mga templo. Tingali alang sa ubang tawo ang pagbayad og ikapulo usa ka maayo nga ideya. Apan para niya dili.
Sa dihang si Logan nag-edad og siyete, nakabantay siya nga ang mga tawo nagpahiyom sa dihang ilang gitunol ang mga sobre sa ikapulo ngadto sa bishop. Ang paghatag ba sa inyong kwarta tinuoray nga makapalipay ninyo?
Sa dihang nag-edad siya og otso, si Mama nangutana niya, “Logan, nganong mipili man ka nga magpabunyag?”
Sayon kana nga pangutana! “Aron motuman sa mga sugo ug mosunod ni Jesukristo,” miingon si Logan.
“Kon mao andam ka na ba nga motuman sa sugo nga mobayad og ikapulo?” Nangutana si Mama. “Naa ra nimo.”
Nahugno ang kasingkasing ni Logan. Dili kadto sayon nga pangutana. Dili pa gihapon siya gusto nga mohatag sa iyang kwarta. Apan gusto gyod siya nga motuman sa mga sugo. Naghunahuna si Logan bahin sa mga templo ug sa mapahiyomon nga mga tawo nga mibayad og ikapulo. Miginhawa siya og lawom ug miingon, “Oo.”
“Maayo kana nga pagpili!” Miingon si Mama.
Mas miarang-arang na ang gibati ni Logan. “Nasayod ko nga ang pagtuman sa mga sugo mas importante kaysa pagtipig sa tanan nakong kwarta.”
Pagka-Dominggo, sa dihang iyang gitunol ang iyang unang sobre sa ikapulo ngadto sa bishop, nabantayan ni Logan nga nagpahiyom siya. Mibati siya og kalipay! Wala pa gihapon niya masabti ang tanan mahitungod sa ikapulo. Apan gihigugma niya ang Dios, ug siya nasayod nga ang Dios mopanalangin kaniya sa pagsunod sa mga sugo.
Mga paghulagway pinaagi ni Shawna J. C. Tenney