Ol Not blong Konfrens

Presiden Oaks i tijim se ol famli oli impoten insaed long gospel blong Jisas Kraes. Taem hem i wan yang boe, papa blong hem i ded. Be mama blong hem i tijim gospel long hem, mo gospel i givim hop mo pis long hem. Ol famli oli stap gotru ol jalenj, be yumi save gat evri hop se yumi save stap pat blong wan famli we i no save finis.

Droem wan pikja blong famli blong yu.

Presiden Eyring i talem se taem hem i stap long kolej, saens mo matematik i had blong hem. Hem i filim se i tumas mo hem i wantem givap. Taem hem i prea, hem i filim kamfot mo i leftemap tingting blong hem. Hem i lanem se hem i save mekem evri samting tru long Kraes, we i mekem yumi evriwan i kam moa strong (luk long Filipae 4:13). Taem yumi go tru long ol hadtaem, Papa long Heven mo Jisas Kraes bae Tufala i stap wetem yumi.

Droem mo raetem abaot wan taem we yu bin mekem wan samting we i had wetem help blong Papa long Heven mo Jisas Kraes.

Elda Brown i serem se hem i bin joenem Jos long Jamaeka. Ol fren blong hem oli askem se, “?Olsem wanem nao yu save joenem jos ia? ?Yu yu bilivim evri samting ia?” Be hem i bin kasem wan testemoni we i kam long Tabu Spirit, mo hem i bin stap tru long testemoni blong hem. Taem yumi jusum blong biliv, testemoni blong yumi bae i gro.

Sista Spannaus i talem wan Baebol stori abaot wan woman we i bin invaetem profet Elisa blong go kakae long haos blong hem. Woman ia i bildim wan rum insaed long haos blong hem mekem se bae profet i gat wan ples blong stap long hem. Tabu Spirit i bin konfemem long hem se Elisa i wan profet blong God. Yumitu, yumi save kasem wan testemoni abaot ol profet blong God. Yumi save openem ol hat blong yumi mo obei long daereksen blong olgeta.

Sista Browning i tokbaot hamas ol singsing blong Praemeri oli impoten. Hem i talem se miusik i wan tul we i save help blong planem sid blong testemoni long hat blong yumi. Taem yumi singsing ol singsing blong Praemeri, yumi stap singsing abaot testemoni blong yumi abaot gospel we i kambak long wol. !Jisas i wantem tumas blong yumi stap olsem wan laet blong san!