“Rere blong Stap Gohed blong Gro,” Fren, Novemba 2025, 36–37.
Rere blong Stap Gohed blong Gro
!Jewel i no wantem blong lego ol fren blong hem long Praemeri!
Wan tru stori blong Palau.
Jewel i sidaon long stul insaed long sakramen miting wetem papa mo mama mo brata blong hem. Hem i droem ol pikja blong ol skripja stori. !Hem i traem blong lisin long man we i stap toktok, be hem i filim bel blong hem i fulap long ol bataflae from hem i fraet!
Tedei hem i fas dei blong Jewel blong go long Yang Woman klas be i nomo Praemeri. Hem i no wantem blong lego ol fren blong hem long Praemeri oli stap. Hem i laekem blong singsing mo ridim skripja wetem olgeta.
Be Jewel i kasem 12 yia blong hem long yia ia. Hem i taem nao blong hem i muv i go long Yang Woman program.
Jewel i klosem ol ae blong hem mo i talem wan saelen prea. Papa long Heven, plis helpem mi blong gat wan gudfala Yang Woman klas.
Afta long las prea long sakramen miting, Jewel i pulum gud win blong hem mo i wokbaot i go long klasrum. Ol bigfala gel oli stap finis long klas. I gat olgeta fo. Oli stap toktok mo oli stap laflaf.
“Halo,” Jewel i talem.
Oli smael. “Halo”
Tija i kam insaed mo i welkamem Jewel. Afta hem i statem lesen.
Fulap taem long klas ia, Jewel i filim se hem i stap hemwan nomo. Hem i fraet blong toktok from se hem i no save ol nara gel yet. Bae hem i mas stap long Yang Woman blong wan longfala taem. !Hem i filim olsem hem i wan longfala taem! ?Bae oltaem hem i filim se hem i stap hemwan long ples ia?
Afta wan smol voes i kam long maen blong hem. Bae yu no stap long Yang Woman blong oltaem. Yu gro yu kam bigwan inaf blong muv i go mo lanem moa abaot fasin blong stap olsem wan disaepol blong Jisas Kraes.
Jewel i harem gud long ol toktok ia. Hem i luksave ol toktok ia se Tabu Spirit i stap helpem hem. Nomata we hem i no gat plante fren yet long Yang Woman, be hem i no stap hemwan. Hem i gat Tabu Spirit.
Afta klas i finis, Jewel i faenem famli blong hem.
“?Yang Woman klas i olsem wanem?” Mama i askem.
Jewel i haggem hem. “Hem i Oraet. Mi misim Praemeri, mo mi no save ol gel yet. Be mi filim Tabu Spirit i kamfotem mi.”
Mama i smael. “!I gud blong harem hemia! Mo ating nekis taem bae i moa gud.”
Jewel i sakem hed blong agri. Hem i hop se Mama i talem i tru.
Nekis taem hem i gat Yang Woman klas, Jewel i talem halo long ol gel bakegen.
“Halo, Jewel,” wan long olgeta i talem. “Yu kam sidaon wetem mi!”
Jewel i smael mo i go sidaon kolosap long gel ia. Nem blong hem i Ellie. Tufala i storian plante bifo lesen i stat. Ellie i bin kaen mo i mekem hem i filim welkam.
Long taem blong lesen, tija i askem sapos eniwan i bin gat wan eksperiens wetem Tabu Spirit.
Jewel i leftemap han blong hem. Hem i talem, “Mi bin filim Tabu Spirit i helpem mi taem mi filim fraet blong joen long Yang Woman”. “Tabu Spirit i helpem mi taem mi gro mo fesem ol hadtaem.”
Jewel i bin stap tingting long olsem wanem Tabu Spirit i bin kamfotem hem taem hem i filim se hem i stap hemwan. Hem i wan gudfala filing blong serem eksperiens blong hem wetem ol gel insaed long Yang Woman.
Afta we hem i serem eksperiens blong hem, samfala gel tu oli serem eksperiens blong olgeta. Jewel i laekem blong harem wanem we olgeta oli gat blong serem.
Jewel i stap misim Praemeri yet samtaem. Be from Tabu Spirit, hem i rere blong gohed blong stap gro.
Ol pikja droing oli kam long Liz Brizzi