“Joes blong Logan long saed blong Taeting,” Fren, Novemba 2025, 8–9.

Joes blong Logan long saed blong Taeting

I kam long Alissa Holyoak

“?Yu rere blong obei long komanmen ia blong pem taeting?” Mama i askem.

Wan tru stori we i kam long USA.

Wan boe i luk olsem se hem i no sua long wan han we i stap holem wan dola not

!Taem Logan i bin gat faef yia, hem i ting se taeting i wan tingting we i no stret!

Long taem blong famli haos naet, Mama i putum 10 dola long tebol. “Bae yumi tingting olsem se yu nao, yu kasem 10 dola ia.”

Logan i smael. “ORAET!”

“Taeting hem i 10 pesen. So bae yu givim 1 dola i go long Jos blong Lod.” Mama i pusumaot 1 dola i go longwe long ol nara hip we i stap.

Fes blong Logan i nogud. “?Givimaot 1 dola i go? !Be mi wantem kipim evri mane blong mi!”

Mama i talem, “maet bae yu filim i defren taem bae yu gro i kam bigwan”. “Papa long Heven i blesem yumi wetem evri samting. Blong pem taeting i wan wei blong soem long God se yumi lavem Hem mo yumi glad long ol blesing blong Hem.”

Wan boe i werem ol klos blong go long jos mo i stap lukluk i go long wan tempol.

Taem Logan i bin sikis yia, ol Praemeri tija blong hem i tijim hem se oli yusum mane blong taeting blong stap bildim ol tempol long hem. Logan i laekem ol tempol. Mekem se maet long sam pipol pem taeting i wan gudfala tingting. Be i no blong hem.

Taem Logan i gat seven yia, hem i stap luk ol pipol oli smael taem oli stap givim envlop blong taeting blong olgeta i go long bisop. ?I tru se taem yu givimaot mane blong yu i mekem yu yu glad?

Taem hem i gat eit yia, Mama i askem hem, “Logan, ?from wanem yu jusum blong kasem baptaes?”

!Hemia i wan isi kwestin! “Blong kipim ol komanmen mo folem Jisas Kraes,” Logan i talem.

“Yu rere blong obei ol komanmen mo blong pem taeting?” Mama i askem. “Hem i stap long yu.”

Logan i harem nogud. Hemia i no wan isi kwestin. Hem i gohed blong no wantem givimaot mane blong hem. Be hem i wantem blong kipim ol komanmen. Logan i tingting long ol tempol mo ol pipol we oli stap smael taem oli pem taeting blong olgeta. Afta hem i pulum gud win blong hem mo talem, “Yes.”

“Hemia bae i wan gudfala joes!” Mama i talem.

Logan i filim i kam gud moa. “Mi save se blong kipim ol komanmen i moa impoten bitim blong kipim evri mane blong mi.”

Wan boe we i werem ol klos blong go long jos i stap smael mo stap holem wan envlop blong taeting

Long Sandei, Logan i smael taem hem i givim fas taeting envlop blong hem i go long bisop. !Hem i bin filim glad! Be yet hem i no andastanem gud evri samting abaot taeting. Be hem i lavem God, mo hem i save se God bae i blesem hem from hem i obei long ol komanmen.