Pis long Prea

“!I hae moa, Papa!” Mary i singaot.

Papa i laf mo givim wan bigfala pus long swing. Swing ia oli fasemtaet long wan bigfala tri we i lei i go long Misisipi Reva. Mary i laekem win we i fas long fes blong mo filing we hem i gat long bel blong hem taem hem i swing i go aot long wota mo kambak.

“!Mi nekis wan!” Elizabeth i talem.

Mary i jiam aot long swing blong letem sista blong hem i swing.

Famli blong Mary oli stap long Nauvu. Papa mo mama blong hem oli bin joenem Jos sam yia i pas, mo oli salem evri samting we oli gat blong muv i go long ples ia blong joenem ol nara Sent.

Nauvu i bin wan bisi ples. Niu pipol oli kam evri dei. Hem i wan hadwok blong bildim wan niufala taon, iven ol pikinini tu oli help. Blong stap help i mekem Mary i filim se hem i stap gro mo hemia i impoten. Samtaem Mary i help blong karem lanj blong Papa i go taem hem i stap wok long niufala tempol.

Long Sandei, Meri i werem bes dres blong hem mo helpem ol brata mo sista blong hem oli rere blong Jos> Evriwan oli kam tugeta andanit long ol tri blong lisin long Profet Josef Smit i tij abaot Jisas Kraes. Mary i laekem blong lanem abaot olsem wanem oli save laef bakegen wetem Papa long Heven samdei. Profet i bin luk mo harem plante gudgudfala samting.

Sam nara pipol oli no bin laekem Profet nating. Mary i bin harem ol stori abaot pipol we oli wantem blong spolem hem.

Wan sama naet, Mary i bin stap helpem mama afta long dina. Afta, Papa i kam long haos. Hem i gat wota long ol ae blong hem.

“?Wanem i hapen?” Mama i askem.

“Oli kilim ded Profet Josef,” Papa i talem.

Mama i stat blong krae tu. “?Jos bae i gohed olsem wanem naoia we hem i nomo stap?” mama i askem.

Mary i filim nogud tumas mo i fraet. Hem i save se profet i wokman blong God we Hem i jusum hem. ?Olsem wanem nao Papa long Heven i letem hemia i hapen?

Hem i stat blong krae mo ron aot long haos i go long garen. Afta we hem i nildaon kolosap long sam bus, Mary i stat blong prea. “O, Papa long Heven, ?bae mifala i mekem wanem nao? Oli kilim profet blong mifala.” Ol wota blong ae blong hem i stap ron daon long fes blong hem.

Afta wan naesfala mo sofsof voes i kam long maen blong Mary. Bae Mi resemap wan nara profet blong lidim pipol blong Mi.

Wan filing blong pis mo glad i fulumap hat blong hem. Hem i waepem ol ae blong hem mo i ron kwik i gobak long haos.

“Mama! Papa!” Mary i talem. “Mi bin talem wan prea, mo Papa long Heven i ansarem mi.” Hem i talem long tufala abaot voes mo filing blong pis we hem i bin filim.

Taem Mama mo Papa i haggem hem, Mary i save se evri samting bae i oraet. Hem i stap harem nogud yet, mo hem i save se bae i gat ol hadtaem bae i kam yet. Be Papa long Heven bae i gohed blong lidim mo helpem olgeta.

Ol pikja droing oli kam long Kristin Sorra