Wan Visit i go long King Apuman

Gift i lei agensem saed blong bod mo wajem wetem sapraes taem wota i stap slapem ol saed blong bot. Hem i pusum ol han blong hem i go daon long ol wef mo i stap filim spre blong wef i fas long ol han blong hem. Hemia i bin wan gudfala dei blong hem blong travel. Hem mo famli blong hem oli stap long rod blong go long vilej blong Apu man, mo evri taem long rod ia hem i stap muv i go moa kolosap long wan wol we i moa wael mo i fri bitim taon we hem i stap livim biaen.

Long taon, Gift i traem bes blong folem stael blong laef long taon. Hem i wan we i no semmak long plante gel. Samtaem i naes nomo blong filim olsem—blong stap olsem hem nomo, no gat man i kea tumas abaot wanem hem i jusum blong werem o mekem. Be long vilej blong apu man blong hem, i defren. Long ples ia, Gift i spesel. Hem i wan prinses—apugel blong wan waes king.

Afta long tu(2) aoa, bot i go so. Longfala pat blong travel i stap yet long fored: sikis aoa blong ron long bas. Hem i save se bae hem i taet, be bae i no longtaem hem i save stap wetem apu man blong hem bakegen. Hemia nao i mekem travel ia i gat praes.

Rod blong bas i rafraf tumas. Blong pasem taem Gift i luk tru long windo ol klaod we oli stap fomem ol defren sep mo naesfala lanskeip we oli stap flae pasem hem. San i stat blong go daon taem bas ia stop. !Naoia Nao! !Apu man! Gift i jiam aot long bas mo ron i go long vilej haos.

Hem i stap lukaot apu man insaed long haos. Hem i lukaotem insaed long fran yad, ples we mama blong hem i stap lukaot long ol nani long hem long taem we hem i smol. Hem i lukaotem long ol bedrum, ples we long naet hem i mas klosem ol windo from ol moskito. Hem i lukaotem insaed long yad biaen long haos, ples we hem i bin werem longfala dres blong kwin—mo wan pepa hat blong kwin we i saen—blong atendem vilej kaonsel.

Long ples ia, Gift i luk Apu man i stap sidaon kwaet long wan stul mo stap lukluk long garen blong famli. Gift i smael.

“Apu man!” hem i singaot.

Apu man i stanap mo openem ol han blong hem. “Dia gel blong mi,” hem i talem slo nomo mo haggem Gift. “Sidaon mo spel wetem mi.”

“Mi misim yu,” Gift i talem.

“Mi misim yu moa. Mi glad yu stap ia.” Apu man i stop smol taem mo afta i askem, “Yu save hamas garen ia i impoten?”

Gift saksakem hem blong hem blong no agri.

Apu man i poenem tri we i stap long fored blong tufala. “Hemia i famli tri,” hem i talem. Gift i luksave se tri ia i olfala mo i strong.

“Ol tael long graon raon long tri ia oli gat ol nem blong ol bubu blong yumi. Yumi mas tingbaot ol famli blong yumi oltaem.”

Gift i no luksave plante long ol nem long ol tael ia. Olsem wanem nao hem i save tingbaot wan we hem i no save? “Apu man , talem long mi abaot olgeta,” Gift i talem.

Apu man i ridim ol nem ia wan afta wan mo talem ol stori blong ol bubu blong Gift long hem. Taem apu man i stap toktok, Gift i kam blong luksave se ol stori ia i ol stori blong hemtu. Hem i gat plante samting we i semmak long ol memba blong famli ia we hem i neva mitim olgeta.

Long taem ia, Gift i andastanem wan samting we i impoten. I no ol wef mo graon nomo we i mekem hem i filim se hem i fri long ples ia. Hem i koneksen we hem i gat wetem famli blong hem we hem i filim long vilej ia wetem Apu man.

Apu man i talem ol stori kasem taem we ol sta oli stap muv antap skae.

Afta nao, Apu man i talem. “Yumi nid blong go insaed.”

“Smol taem moa,” Gift i talem.

Gift i wokbaot i go long tri mo tajem skin blong tri ia. Afta Hem i lukluk ol tael long graon mo tingbaot stori blong wanwan bubu. Wan dei bae hem i visitim tempol mo mekem ol tabu odinens blong olgeta. From olgeta ia nao, mekem se hem i save stap naoia. Bae hem i mekem pat blong hem blong givim bak presen ia we oli bin givim long hem.

Apu man i pusum han blong hem i go long hem, mo Gift i holem. Wetem wan las lukluk i go long famli tri, Gift i go insaed, long ples plante famli oli stap wet blong talem halo long hem.

Openem PDF

Pikja droing i kam long Audrey Day