“Las Mitbol,” Fren, Novemba 2025, 18–19.

Las Mitbol

I kam long Savannah L. Tanner

!I no stret ia! !I no gat wan i serem samting wetem Alex!

Wan tru stori we i kam long USA.

Tri boe oli stap lukluk strong long olgetawan mo wan mitbol long wan fok

Alex i wokbaot strong long floa mo bloem aot bigfala win aot long maot.

Mama i tekemaot lukluk blong hem long buk. “?Wanem i rong?”

“!I no gat wan bae i serem samting wetem mi!” Alex i talem. “Mi no laekem blong stap wan medel pikinini.” Ol brata blong Alex oltaem oli kasem wanem oli wantem. Hem i no stret nomo.

“Mi sua sapos yu askem gud, ol brata blong yu bae oli serem wetem yu,” Mama i talem.

Fes blong Alex i nogud. “!Mi bin askem gud!”

“Olsem wanem sapos yu setemap taem? Long wei ia wanwan long yufala bae i gat semfala amaon blong taem blong plei.”

“!Mi bin setemap taem!” Alex i talem. “Be ating bae mi setemap tu(2) taem blong mekem sua nomo.” Hem i karem wan ekstra klok long kijin tebol mo folem lada i go antap. Yangfala brata blong hem, David, i stap plei wan gem long TV.

“Mama i talem se yu mas serem,” Alex i talem. Hem i setemap taem blong faef minit. “Taem faef minit i finis, bae i taem blong mi.”

Long nekis dei, taem Alex mo bigfala brata blong hem, Jake, tugeta i wantem blong plei wan gem, tufala i setemap wan taem blong 30 minit stret blong wanwan long tufala. Taem David mo Jake tugeta i plei wetem ol blok, tufala i kaontem stret semmak namba blong wanwan long tufala. Mo taem David mo Alex tugeta i wantem lasfala joklet jip biskit, tufala i katem stret long medel. Ol samting oli stat blong kam stret.

Be naoia hem i taem blong dina …

Long naet ia, !oli kakae spageti mo ol mitbol! Jake i stat blong hipimap pasta long plet blong hem bifo Alex i save karem spun.

“Ei, i no stret ia,” Alex i talem. “!Mi tu mi hanggri ia!”

Papa i tajem solda blong hem. “Alex, i gat plante kaekae blong evriwan. Luk, bae mi kasem blong yu, semmak olsem we Jake i gat.” Papa i putum sam pasta long plet blong Alex.

Afta we oli blesem kaekae evriwan i stat blong kakae. Taem we Alex i finisim kaekae blong hem, be hem i hanggri yet. Hem i lukluk insaed long sospen long medel blong tebol. I gat wan las mitbol i stap antap long hip blong ol pasta. Hem i kasem i go long plet blong hem.

“I no stret ia!” David i talem. “Hemia i las mitbol.”

Jake i poenem mitbol wetem fok blong hem. “Mi wantem sam tu. Yumi splitim.”

“?Splitim?” Alex i talem. “?Blong yumi tri(3)? Be i smol tumas.”

Jake mo David i agri. “Bae i stret olsem.”

Jake i tekem plet blong Alex mo stat blong divaedem mitbol long tri pat. Alex i wajem mitbol ia i stap go smol evriwan.

Mama i laf. “Ol pis ia oli smol tumas!”

Papa tu i laf. “I no mas stap stret gud oltaem,” hem i talem. “Maet bae i moa gud blong stap serem ol samting we yumi gat, be i no blong stap splitim evri samting.”

Alex i lukluk daon long ol smol pis blong mitbol. Hem i olsem wan krangke samting. ?Hem i kea tumas olsem abaot mitbol ia? Maet hem i nid blong lanem moa blong stap serem samting.

Long nekis dei, taem Jake mo Alex tugeta i wantem blong plei wetem ol blok, oli jusum blong bildim wan samting tugeta. Taem David mo Jake i stap aotsaed, Alex i letem tufala blong ronron long baeskel blong hem. Mo taem evriwan oli wantem plei wan gem long TV Alex i no bin setem eni taema. Blong stap serem samting mo stap kaen i gat wan moa gud filing bitim we blong stap traem blong mekem i stret.

Long naet ia, taem Jake mo Alex i wantem lasfala rol long dina, , Alex i talem long Jake se ham i save kakai fulwan.

“!Tangkyu!” Jake i sarem wan saed ae. “Yu sua yu no wantem splitim long tri?”

David mo Alex i laf. “No, !i stret ia nao!”