15,100 mo i Go Moa

!Taem bae mi kasem eit yia, bae mi save gat FamilySearch akaon blong miwan! Fastaem mi bin fraet, be papa mo mama, ol brata, sista blong mi oli tijim mi olsem wanem blong mekem indeks mo krietem famli tri blong mi blong mi save helpem ol bubu blong mi. Afta long hemia, mi nomo filim fraet. Mi filim se oli sapotem mi mo mi redi.

Mo mi kasem filing ia blong wantem kam wan man blong riviu long famli histri olsem papa mo mama mo ol brata mo sista blong mi. Mi jusum hemia olsem wan long ol gol blong mi blong program blong ol Pikinini mo Ol Yut. Blong kasem gol ia, mi mas mekem 1,000 indeks rekod.

Samtaem mi filim olsem i gat tumas blong mekem. Be papa mo mama blong mi tufala i rimaenem mi se bae mi no save mekem evriwan long wan dei nomo. Be, Mi mas fokas blong mekem tri rekod nomo long wan dei, mo bifo wan yia bae mi mitim gol blong mi. Oli talem se sapos mi gat hadtaem blong andastanem ol pikja, bambae olgeta oli save helpem mi.

Mi prea long Papa long Heven blong Hem i save helpem mi mitim gol blong mi. Mi filim gud moa afta long prea blong mi.

Mi no givap mo mi gohed blong mekem indeksing dei afta dei. Afta long wan yia, bifo mi kasem naen yia blong mi, mi bin mekem finis kolosap bitim 1,000 rekod mo kasem taetol blong mekem riviu. !Mi bin glad tumas!

Naoia mi stap go long Trujillo Peru Tempol oltaem wetem papa mo mama blong mi. Mi help blong printim ol odinens kad, katemaot olgeta, mi givim ol kad ia long wanwan famli memba blong oli save mekem ol odinens taem mi stap wet long garen blong tempol. Bae i no longtaem bae mi save go insaed blong mekem ol baptaes.

!Mi gat 10 yia naoia mo mi mekem 15,100 indeks rekod finis! Mi glad tumas blong gohed blong stap kasem ol gol blong mi blong kam moa olsem Jisas Kraes.

Ol pikja drowing oli kam long Parker Nielsen