Tungod sa Templo

Ni Lucy Stevenson Ewell

Usa ka tinuod nga istorya gikan sa Vanuatu.

Ang dagway sa nagpahiyom nga batang lalaki atubangan sa mapa sa Vanuatu

“Ania na ang mga misyonaryo!” Nagtawag si Graham. Mikaway siya sa mga misyonaryo samtang sila naglakaw padulong sa ilang balay.

Ang Mama, Papa, ug ang magulang nga lalaki ni Graham, si Nunu, nabunyagan sa miaging tuig. Si Graham ug ang iyang manghod nga lalaki, si Job, bata pa kaayo aron bunyagan. Apan ganahan gihapon sila nga makat-on gikan sa mga misyonaryo.

“Karon gusto namo nga maghisgot mahitungod sa templo,” miingon si Elder Hale. “Kini usa ka espesyal nga bilding diin kamo makahimo og mga saad ngadto sa Dios ug maselyo sa inyong pamilya. Kana nagpasabot nga magkauban kamo hangtod sa kahangtoran.”

“Ang labing duol anaa sa New Zealand.” Si Elder Singh mipakita og litrato sa usa ka matahom nga puting bilding. “Layo ang biyahe. Apan ang mga panalangin bililhon kaayo.”

“Gusto namo nga moadto,” miingon si Mama.

Ang mga ginikanan ni Graham nagplano sa ilang biyahe ngadto sa templo kauban ang lain nga pamilya gikan sa simbahan. Sila ang mahimong unang duha ka pamilya gikan sa Vanuatu nga makasulod sa templo!

Usa ka eroplano nga naglupad padulong sa templo nga adunay bus nga nagdagan padulong niini

Pipila ka bulan human niana, miabot ang adlaw nga mogikan alang sa ilang biyahe. Unang higayon kadto ni Graham nga mosakay og eroplano, ug makalingaw kini. Mitan-aw siya sa mga panganod ug sa kadagatan sa ubos nila. Iyang gihunahuna ang taas nga puti nga bilding diha sa iyang hunahuna. Dili na siya makahulat nga makita kini!

Sa dihang nakatugpa na sila, misakay sila og bus. Nag-untol-untol sila sa biyahe kay libaongon ang kalsada, ug gikapoy si Graham. Apan hapit na sila maabot.

“Tan-awa!” Mitudlo si Graham sa gawas sa bintana. Mao na kana! Mas nindot pa kining tan-awon kaysa mga litrato.

Sulod sa templo, hilom ug malinawon. Sila nagsul-ob og puti tanan. Sa makadiyot, si Graham ug ang iyang mga igsoong lalaki naglingkod sa hulatanan nga lawak ug nagtan-aw sa mga hulagway ni Jesukristo.

Dayon usa ka temple worker ang migiya nila ngadto sa lawak sa pagselyo. Ang mga ginikanan ni Graham nagluhod sa altar nga gitabonan og humok nga tela. Makita nga sila malipayon kaayo!

Si Graham ug ang iyang mga igsoong lalaki miluhod tupad ni Mama ug Papa. Mitan-aw sila sa dako, tag-as nga mga samin diha sa bungbong. Ang ilang repleksiyon walay kataposan.

“Ang mga samin magpahinumdom ninyo nga kamo mahimong magkauban hangtod sa kahangtoran,” miingon ang temple worker.

Si Graham mibati og kamalipayon, ug kasegurohan. Kini daw ang Manluluwas migakos niya pag-ayo.

Sa wala madugay oras na sa pagpauli. Diha sa bus ug sa eroplano, si Graham nagpadayon sa paghunahuna sa espesyal nga pagbati niya didto sa templo.

Pipila ka adlaw human niana, usa ka dako nga bagyo ang miabot. Ang mga palmera nga kahoy makita nga mura na og mabali og katunga!

Nahadlok si Graham. “Ma-OK ra ba kita?”

“Oo,” matod ni Papa. “Apan kusog kaayo kini nga mga hangin. Ang mga misyonaryo miingon nga magpundok sa bilding sa simbahan hangtod nga mahuman ang bagyo.”

Pamilya nga naglingkod sa bangko nagtan-aw sa gawas sa bintana sa gitayhop nga mga kahoy

Gitabangan ni Graham si Mama nga magdala og pagkaon ug mga habol ngadto sa simbahan. Kusog kaayo ang hangin!

Sa sulod, miarang-arang ang gibati ni Graham. Ang tanan nilang higala gikan sa simbahan anaa didto. Apan madungog gihapon niya ang hangin nga naghaguros.

“Unsaon na lang ang atong balay?” Nangutana si Graham.

“Kinahanglan kitang maghulat hangtod nga mahuman ang bagyo aron matan-aw.” Gigakos siya ni Mama. “Ang labing mahinungdanon mao nga luwas ang atong pamilya. Nakahinumdom pa ka unsay imong gibati didto sa templo?”

Mitando si Graham. “Mibati ko og kainit ug kasegurohan.”

Mipahiyom si Papa. “Ug tungod ni Jesukristo ug sa atong pagselyo sa templo, kita mahimong magkauban hangtod sa kahangtoran.”

Gihunahuna ni Graham ang init, malinawon nga pagbati nga iyang gibati sulod sa templo. Sakto si Papa. Tungod ni Jesukristo ug sa mga pakigsaad sa templo, sila mahimong pamilya hangtod sa kahangtoran. Ug tungod kay nakahibalo siya niana, mahimong OK ra ang tanan.