“5 ka Butang nga Hinumdoman mahitungod sa Kahilwasan sa Lawas,” Higala, Septiyembre 2025, 38–39.

5 ka Butang nga Hinumdoman mahitungod sa Kahilwasan sa Lawas

Ang inyong lawas usa ka gasa gikan sa Langitnong Amahan. Gusto Siyang motabang kanimo nga mahimong luwas ug malipayon. Kon ang usa ka tawo mosulay sa pagpasakit kanimo pinaagi sa mga pulong o mga buhat, dili kana OK! Kinahanglan kitang magmabination ug matinahoron sa uban, ug kinahanglan kita nga molaom nga sila mahimong mabination ug matinahoron usab kanato.

OK ra nga mosulti og dili, bisan pa ngadto sa usa ka hamtong. Ikaw maoy magbuot sa imong lawas. Kana nagpasabot nga makabuot ka kon ang usa ka tawo makahikap, makagakos, o makahalok nimo. Mahimo kang mag-anad nga mosulti nga “Dili,” “Ayaw ko hikapa,” ug “Pasagdai kong mag-inusara.” Kon ikaw hikapon o sugoon sa pagbuhat og usa ka butang nga makahimo nimong dili komportable, OK ra nga mosulti og dili ug mobiya kon mahimo nimo.
Hibaloi hain nga mga paghikap ang luwas o dili luwas. Ang luwas nga paghikap motabang nimo nga mobati nga gihigugma (sama sa gakos o pag-aper [high five]) o magpabiling limpyo ug himsog (sama sa ginikanan nga magtabang nimo nga maligo o doktor nga magtabang nimo kon ikaw dunay sakit). Usahay ang luwas nga paghikap makapasakit, sama sa pagdawat og indyeksiyon, apan luwas kini tungod kay makapahimsog kini nimo. Ang dili luwas nga paghikap makapasakit sa imong lawas ug mga pagbati, sama sa pagbunal, pagtukmod, o paghikap sa pribado nga mga parte sa usa ka tawo. Kining sakit o dili komportable nga mga paghikap dili OK.
Adunay mga parte sa imong lawas nga mga pribado diin ang laing tawo dili gyod angay mohikap nimo. Ang pribadong mga parte naglakip sa mga parte sa imong lawas nga gitabonan sa swimming suit. Dili gyod OK alang sa uban nga mohikap sa imong pribado nga mga parte (bisan sa ilalom o gawas sa imong mga sinina) o mosugo nimo sa paghikap sa ilaha. Kon kini mahitabo nimo, pakig-istorya sa usa ka masaligan nga hamtong sa labing dali kon mahimo.
Hinumdomi ang kalainan tali sa mga sekreto ug mga sorpresa. Ang surprisa usa ka butang nga malipayon nga makalingaw sa tanan, sama sa regalo sa adlawng natawhan. Ang usa ka sekreto mao kon ang usa ka tawo mosulti nimo sa dili pagsulti ni bisan kinsa. Kon gihangyo ka sa dili pagsulti sa usa ka sekreto mahitungod sa usa ka tawo nga naghikap o nagpasakit nimo, pakigsulti dayon sa usa ka tawo nga masaligan nimo. Padayon sa pagsulti sa masaligan nga mga hamtong hangtod adunay usa ka tawo motabang nimo nga mahimong luwas.
Kon ang usa ka tawo mohikap nimo o mopasakit nimo, dili kana imong sayop. Ang usa ka tawo nga nakapasakit nimo tingali mosulay nga mopahimo nimo o sa uban nga motuo nga ikaw dunay gibuhat nga sayop nga butang, apan wala kay sayop nga gibuhat. Ang Langitnong Amahan ug si Jesukristo nakaila ug nahigugma kanimo sa hingpit. Pangayo og tabang sa usa ka masaligan nga hamtong, ug hinumdomi nga ikaw kanunay nga makaampo sa Langitnong Amahan alang usab sa tabang.