“Ang Sinina sa Bunyag ni Harvey,” Higala, Septiyembre 2025, 36–37.
Ang Sinina sa Bunyag ni Harvey
Dili makit-an ni Harvey ang iyang puti nga sinina bisan asa!
Usa ka tinuod nga istorya gikan sa Indonesia.
Naglingkod si Harvey nga naghuot sa likod sa taksi kauban ni Ibu (Mama) ug Bapak (Papa). Padulong sila sa simbahan alang sa bunyag ni Harvey.
“Bapak, unsa ang imong gibati sa dihang gibunyagan ka?” Nangutana si Harvey. Gibunyagan si Bapak sa miaging pipila ka bulan. Karon nga otso na si Harvey, bunyagan usab siya!
Naghunahuna si Bapak sa makadiyot. “Bugnaw kaayo ang tubig!” miingon siya nga nagkatawa. “Apan mibati usab ako og daghang gugma. Bisan tuod og kadaghanan sa atong pamilya dili mga miyembro sa atong simbahan, akong gibati ang ilang gugma ug ang gugma sa Dios.”
Sa dihang miabot sila sa bilding, pipila ka tawo gikan sa simbahan ang mitabang nila nga pun-on ang bunyaganan og tubig ug mag-andam.
“Harvey, oras na aron mag-ilis ngadto sa imong sinina sa bunyag,” miingon si Ibu. Mitando si Harvey ug nakit-an ang bag nga gisudlan sa iyang mga sinina. Apan ang iya lamang puting karsones ang naa sa bag. Dili niya makit-an ang iyang puti nga sinina! Gisusi niya ang uban nga mga bag ug nangita palibot sa simbahan.
“Ibu, wala diri ang akong sinina,” miingon si Harvey.
Nagmug-ot si Ibu. Gisusi usab niya ang pipila ka bag. “Tingali nahabilin nato kini sa taksi.”
“Aduna kitay pipila ka sobra nga mga sinina sa bunyag nga naa sa kabinet,” miingon si Sister Putri. “Akong kuhaon.”
Apan ang nag-inusarang sinina sa bunyag gikan sa kabinet dako ra kaayo alang ni Harvey. Makita nga nabalaka si Ibu. Sa dili madugay magsugod na ang bunyag. Daghan nang tawo ang naa na dinhi, ug wala ang sinina ni Harvey.
“Tingali pwede kita nga makalitok og pag-ampo nga ibalik sa drayber sa taksi ang sinina,” miingon si Harvey. “Apan kon dili niya kini ibalik, mahimo ra ko nga mosul-ob og sinina nga dako kaayo. Baliwala ra nako kon unsay akong isul-ob. Gusto lang gayod ko nga magpabunyag.”
Mitando si Ibu ug Bapak. Nagkuyog sila og adto sa kusina, diin hilom. Dayon sila mikyugpos sa ilang mga kamot ug miduko sa ilang mga ulo.
Si Harvey ang nag-ampo. “Minahal nga Langitnong Amahan, salamat Nimo nga mabunyagan ko karon. Palihog tabangi ang drayber sa taksi nga ibalik ang akong sinina. Apan kon dili, OK lang gihapon.”
Human sa ilang pag-ampo, milakaw si Harvey aron mag-ilis sa dako kaayo nga sinina. Miabot kini hangtod sa iyang tuhod.
“Harvey!” Nagtawag si Sister Putri gikan sa hawanan. “Naa ang drayber sa taksi.”
Nakit-an ni Harvey ug ni Ibu ang drayber sa taksi sa atubangang pultahan. Nagkupot siya sa sinina ni Harvey!
“Milingi ko ug nakit-an kini sa lingkoranan,” miingon siya. “Naghunahuna ko nga tingali imoha kini.”
“Salamat kaayo,” miingon si Ibu.
Gikuha ni Harvey ang sinina gikan sa lalaki. “Salamat.”
Mipahiyom ang lalaki ug nanamilit.
Sa wala madugay, oras na aron sugdan ang bunyag. Nag-ilis si Harvey sa iyang sinina. Sakto kaayo kini! Ug kini puti ug limpyo.
Sa dihang milakaw si Harvey sulod sa bunyaganan, bugnaw kaayo ang tubig! Gilitok ni Bapak ang pag-ampo ug gibunyagan si Harvey. Sa dihang mihaw-as siya sa tubig, mibati siya og kapresko ug kakalma sa sulod.
Gigiyahan ni Bapak si Harvey pagawas sa bunyaganan ug giputos og humok nga tuwalya ang mga abaga ni Harvey. Gihunahuna ni Harvey ang tanang tawo nga mitabang ug misuporta kaniya. Si Ibu, si Bapak, ang drayber sa taksi, ug ang iyang pamilya. Ug ang Langitnong Amahan ug si Jesukristo usab.
Gigakos ni Harvey si Bapak. “Eksakto ka. Bugnaw ang tubig!” Nangatawa silang duha. Dayon si Harvey mitan-aw sa mga mata ni Bapak. “Apan eksakto ka usab mahitungod sa usa pa ka butang. Gibati nako ang daghang gugma.”
Mga paghulagway ni Bethany Stancliffe