“Usa ka Pakig-istorya uban ni Gabby mahitungod sa Pagserbisyo diha sa Simbahan,” Higala, Septiyembre 2025, 40–41.
Usa ka Pakig-istorya uban ni Gabby mahitungod sa Pagserbisyo diha sa Simbahan
Si Gabby usa ka 11-anyos gikan sa Harare, Zimbabwe. Nangutana kami kaniya og pipila ka pangutana mahitungod sa pagpangulo sa musika diha sa simbahan.
Sultihi kami bahin sa imong kaugalingon.
Ganahan kong magluto og mga dessert ug lamiang mga pagkaon ug magpatugtog sa marimba. Ako mokanta ug mosayaw, ug nagkat-on ko sa pagpatukar sa flute, xylophone, ug piyano.
Sultihi kami mahitungod sa imong bag-o nga buluhaton.
Gihangyo ko sa bishop nga motabang sa pagpangulo sa musika diha sa miting sa sakramento. Wala ko magdahom niini ug naghunahuna nga sila mopili og usa ka tawo nga mas magulang. Apan mibati usab ako nga gihigugma ug malipayon tungod kay ako ganahan og musika.
Usahay mahadlok pa gihapon ko nga makakanta ko sa sayop nga tono ug nga madunggan kini sa mga tawo. Apan ang Espiritu Santo mitabang nako nga mahimong komportable sa atubangan sa tanan. Karon nga naanad na ko niini, makalingaw diay kaayo kini!
Sama sa unsa man ang bation sa pagpangulo sa musika alang sa pasundayag sa miting sa sakramento sa kabataan?
Sa sinugdanan makahadlok kini. Samtang nagpraktis kami, usahay makalimot ko sa ubang pulong. Mao nga nagpraktis ko sa pagkanta kauban sa akong mama sa balay, ug dako kaayo kana og gikatabang. Sa dihang nagpraktis kami sa Primary, mas gikusog nako og kanta aron matabangan kadtong dili makabasa o wala makahibalo sa mga pulong.
Mibati ko og kahinam sa pag-abot sa adlaw sa pasundayag. Ang tanan nindot kaayo ang pagkahan-ay. Gibati nako ang kalinaw ug kakalma, ug nakahinumdom ra gyod ko sa mga pulong.
Unsa man ang imong nakat-onan gikan niini nga kasinatian?
Nakat-on ko nga usahay ang mga butang dili perpekto ang pagkahitabo, apan OK lang ug makakat-on ra ka gikan niini. Ang pagpangulo sa musika sa Primary nag-andam usab nako alang sa akong bag-o nga buluhaton!
Unsa ang imong ikatambag sa uban mahitungod sa pagserbisyo diha sa simbahan?
Usahay tingali lisod ang pagserbisyo sa atubangan sa daghang tawo, apan ang butang mahitungod namong mga bata mao nga kami mahimong ehemplo sa uban bisan unsa pa ang among edad o unsa kami kamubo o kataas. Ako silang ingnon nga bisan og usahay ang among kahadlok tingali makapaluya namo, ang Espiritu Santo makatabang namo nga mobati og kamalinawon. Siya kanunay nga motabang kanato nga madasig pagbalik.