“Pangutana ni Lou para sa Komperensiya,” Higala, Septiyembre 2025, 4–5.
Pangutana ni Lou para sa Komperensiya
“Angay ba kong moadto sa party ni Alice?” Misulat si Lou.
Tinuod nga istorya gikan sa Belgium.
Mahinamon si Lou samtang gigisi niya aron maablihan ang sobre. Ang iyang labing suod nga higala nga si Alice magpa-party sa iyang adlawng natawhan, ug giimbita siya!
Apan samtang gibasa ni Lou ang imbitasyon, naguol ang iyang kasingkasing. Laing pang-Dominggo nga party na usab, naghunahuna siya.
Ang pamilya ni Lou dili moadto og mga party sa Dominggo. Hinuon, maggahin sila og panahon nga magkauban, mosimba, ug mobuhat og laing mga butang aron mohinumdom sa Manluluwas.
Apan kini nga party lisod kaayo nga balibaran. Makahimo ba siya nga dili motambong sa adlaw sa iyang labing suod nga higala?
“Dili ba diay pwede nga moadto ko bisan niini lang usa ka higayon?” Gipangutana ni Lou ang iyang mga ginikanan nianang gabhiona. “Nahibalo ko nga importane ang mga Dominggo. Apan dili ko ganahan nga dili makaapil niini.”
“Lisod kana nga pagpili,” miingon si Papa. “Gihangyo kita sa Langitnong Amahan nga himoon ang Dominggo nga usa ka balaan nga adlaw. Apan ikaw ang mohimo og desisyon kon unsaon nimo kana sa paghimo.”
Si mama migakos ni Lou. “Ang kinatibuk-ang komperensiya mahitabo niining hinapos sa semana. Tingali mao kini ang pangutana nga imong ipangutana.”
Ang pamilya ni Lou adunay tradisyon nga magsulat og ilang pangutana sa wala pa ang komperensiya. Dayon panahon sa komperensiya, maminaw sila alang sa mga tubag.
Nangagho si Lou. “OK.”
Panahon sa tingpangatulog, gisulat ni Lou ang iyang pangutana. Dayon nag-ampo siya. “Langitnong Amahan, gusto gyod ko nga moadto niini nga party, ug wala ko mahibalo unsay buhaton. Mahimo ba nga tabangan ko nimo nga makakaplag og mga tubag samtang magtan-aw ko sa kinatibuk-ang komperensiya?”
Pipila ka adlaw human niadto, si Lou ug ang iyang igsoong mga lalaki naglaray sa sopa. Panahon na kadto alang sa komperensiya! Nagdrowing is Lou sa iyang notebook atol sa pambukas nga awit. Dayon misugod ang unang mamumulong.
Miyahat si Lou. Ang mamumulong naghisgot mahitungod sa adlaw nga Igpapahulay! Misulti siya nga ang Dios mopanalangin niadtong motuman sa Iyang mga sugo, bisan kon ang mga panalangin dili dayon moabot.
“Paminaw nako gitubag na sa Langitnong Amahan ang akong pangutana,” miingon si Lou. “Dali ra kaayo!”
Pagkasunod adlaw didto sa eskwelahan, nakita ni Lou si Alice panahon sa recess. “Salamat sa imong pagdapit nako sa imong party,” miingon si Lou. Miginhawa siya og lawom. “Ang mga Dominggo usa ka espesyal nga adlaw alang nako ug sa akong pamilya. Mao nga dili ko makaadto.”
“OK,” miingon si Alice. “Naguol ko nga dili ka makaadto.”
“Ako sab,” miingon si Lou. “Apan inig ka Sabado, ganahan ka ba nga mokuyog nako ngadto sa trampoline park? Dayon makadula gihapon tang duha ug magsaulog sa imong birthday.”
“Ganahan kaayo ko!” Mingisi ni Alice.
Mibalos og pahiyom si Lou. Ang dili pag-adto sa party usa ka pagpili nga lisod buhaton. Apan nasayod siya nga mao kadto ang sakto nga butang. Ug mapasalamaton siya nga ang Langitnong Amahan mitubag sa iyang importante nga pangutana.
Mga paghulagway pinaagi ni Flavio Remontti