Ko e Tokoni ʻi he Tohi Himí

Fai ʻe Savannah L. Tanner

Ko ha talanoa moʻoni mei Tenimaʻake.

Naʻe saiʻia ʻaupito ʻa ʻAmelia ke hoko ko ha tokotaha tokoni. Naʻá ne tokoni kia Mami ʻi hono tuku ʻa e ʻū peletí ʻi he funga tēpilé. Naʻá ne tokoni kia Teti ke kumi hono suú. Pea naʻá ne fai ʻa e lotú ʻi he taimi ako folofola fakafāmilí.

Finemui ʻoku fakafeʻiloaki ki ha ongo tamaiki fefine ʻi he lotú

ʻI he Sāpate kotoa pē, naʻe ʻalu ʻa e fāmili ʻo ʻAmeliá ki he lotú. Naʻe tā ʻe Mami ʻa e pianó. Naʻe fakaava ʻe hono taʻokete ko ʻEmá ʻa e matapaá ki he tokotaha kotoa pē. Naʻe tala ʻe Teti ʻa e ngaahi fanongonongó. Naʻe tufa ʻe hono tuongaʻane lahi ko ʻAlekisānitá ʻa e sākalamēnití. Naʻe tokoni ʻa e tokotaha kotoa pē ʻi he lotú.

Tokotaha kotoa pē kae tuku kehe pē ‘a ʻAmelia!

Naʻe ʻiloʻi ʻe ʻAmelia naʻe tokoniʻi ʻe Sīsū Kalaisi ʻa e tokotaha kotoa pē naʻá Ne fetaulaki mo iá. Naʻá ne fie tokoni ʻo hangē ko Iá! Ka naʻe ʻikai ke ne lava ʻo tā ʻa e pianó. Naʻe ʻikai foki ke ne lava ʻo tokoni ʻi he ngaahi fanongonongó. Naʻá ne kiʻi ongoʻi loto-mamahi. Mahalo pē te ne lava ʻo tokoni ʻi heʻene matuʻotuʻa angé.

Ko ha tangata tui suti ʻoku talanoa ki ha kiʻi taʻahine ʻi he lotú

ʻI ha ʻaho ʻe taha kimuʻa ʻi he lotú, naʻe haʻu ʻa e palesiteni fakakoló kia ʻAmelia. Naʻá ne malimali mo fehuʻi ange, “Te ke lava ʻo tufa ʻa e ʻū tohi himí?”

Naʻe malimali atu ʻa ʻAmelia. “ʻIo!”

Ko ha kiʻi taʻahine ʻokú ne toʻotoʻo ha fokotuʻunga ʻo e tohi himi

Naʻá ne toʻo fakalelei mai ha fokotuʻunga tohi himi lanu mata mei ha funga laupapa. Naʻá ne tuku ha tohi ʻi he sea takitaha.

Tangata, fefine mo ha taʻahine ʻoku nau tangutu ʻi ha sea ʻi he lotú ʻo fakaʻaongaʻi ʻa e ʻū tohi himí ke nau hiva

ʻI he kamata ʻa e lotú, naʻe fakaava ʻe he tokotaha kotoa pē ʻenau tohi himí. Naʻe fuʻu ongoʻi fiefia ʻaupito ʻa ʻAmelia. Kuó ne tokoniʻi kinautolu kotoa ke nau lava ʻo hiva fakataha!

Talu mei ai mo e tokoni ʻa e tokotaha kotoa pē ʻi he fāmili ʻo ʻAmeliá ʻi he lotú. Naʻe tā ʻe Mami ʻa e pianó. Naʻe fakaava ʻe ʻEma ʻa e matapaá. Naʻe tala ʻe Teti ʻa e ngaahi fanongonongó. Naʻe tufa ʻe ʻAlekisānita ʻa e sākalamēnití Pea naʻe hili ʻe ʻAmelia ʻa e ʻū tohi himí ʻi he ʻū seá.

Naʻe ongoʻi fiefia ʻa ʻAmelia ʻi heʻene lava ʻo tokoni ki he Tamai Hevani. Naʻá ne ʻiloʻi naʻá Ne finangalo ke ne tokoni ʻo hangē ko ia naʻe fai ʻe Sīsuú.