Fale Fakapōpula Lipetií

ʻŪ fale ʻoku vela mo e kau tangata ʻita mo ʻenau ngaahi meʻafana

Naʻe tokolahi ha kakai ʻi Mīsuli naʻe ʻikai ke nau saiʻia ʻi he Kāingalotú. Naʻe fekauʻi atu ʻe he kōvaná ha kau sōtia ke feingaʻi kinautolu ke nau mavahe.

Tangata ʻoku heka hoosi ʻokú ne tuhu ʻaki ha heletā kia Siosefa Sāmita

Naʻe puke pōpula ʻe he kau sōtiá ʻa Siosefa Sāmita mo e kau taki kehe ʻo e Siasí. ʻI ha pō ʻe taha, naʻe kakata ʻa e kau leʻó ʻi he ngaahi meʻa kovi kuo nau fai ki he Kāingalotú.

Siosefa Sāmita ʻoku sēiniʻi hono fasiʻanimá, ʻokú ne tuʻu ʻo talanoa ki he kakai tangata

Naʻe tuʻu hake ʻa Siosefa ʻo kaila, “Fakalongolongo!” Naʻá ne lea ʻaki ʻa e mālohi ʻo e ʻOtuá. Naʻe kole fakamolemole ʻa e kau leʻó pea tuku ʻenau talanoá.

Siosefa Sāmita mo ha kau tangata kehe ʻi he Fale Fakapōpula Lipetií ʻoku nau mata mamahi mo mokosia

Kimui angé, naʻe tuku ʻa Siosefa mo hono ngaahi kaungāmeʻá ʻi ha fale fakapōpula ʻi ha kolo naʻe ui ko Lipetī. Naʻe momoko, siʻisiʻi, mo fakapoʻuli ʻa e fale fakapōpulá. Ko e mohuku ʻuli pē naʻe maʻu ke nau mohe aí. Naʻa nau puke ʻi he meʻakai naʻe ʻoange kiate kinautolú.

Ko Siosefa Sāmita ʻoku tangi pea ʻoku fakafiemālieʻi ia ʻe ha tangata

Naʻe hohaʻa ʻa Siosefa ki he Kāingalotú. Ka naʻe ʻikai ke ne lava ʻo fai ha meʻa ke tokoniʻi kinautolu.

Tūʻulutui ʻa Siosefa Sāmita ke lotu ʻi he fale fakapōpulá

Naʻe lotu lahi ʻa Siosefa. Naʻá ne fehuʻi pe kuo fakangaloki ʻe he ʻOtuá ia mo e kāingalotu ʻo e Siasí.

Tūʻulutui ʻa Siosefa Sāmita ʻi he fale fakapōpulá, ʻo sio hake ki ʻolunga ki he huelo ʻo e laʻaá ʻi ha kiʻi matapā luva siʻisiʻi

Naʻe tali ʻe he ʻOtuá ʻa e lotu ʻa Siosefá. Naʻá Ne folofola ange, “ʻE hoku foha, ke ʻi ho laumālié ʻa e melino.” Naʻe fakahā ʻe he ʻOtuá kia Siosefa he ʻikai tolonga hono ngaahi faingataʻaʻiá ʻo taʻengata pea te nau hoko ʻo lelei kiate ia. Naʻá Ne talaʻofa te Ne ʻia Siosefa “ʻo taʻengata pea taʻengata” (Tokāteline mo e Ngaahi Fuakava 121:7, 46).