Ngaahi ʻEkitivitī ʻo e Haʻu, ʻo Muimui ʻIate Aú

ʻE lava ke maʻu ʻe he kau palōfitá ha fakahā fekauʻaki mo hono langa ʻo e ngaahi temipalé (vakai, Tokāteline mo e Ngaahi Fuakava 84:4–5). Huke ki he peesi 2–3 ke lau ʻa e pōpoaki ʻa e palōfitá fekauʻaki mo e ngaahi temipalé pea fakahoko ha ʻekitivitī.

4–10 ʻAokosi: Tokāteline mo e Ngaahi Fuakava 85–87

Ngaahi Meʻa ʻOku Ou Saiʻia Taha Aí

ʻOku akoʻi mai ʻe he folofolá ʻoku totonu ke tau hiki ha ngaahi meʻa mahuʻinga (vakai, Tokāteline mo e Ngaahi Fuakava 85:1–2). Tohi, tā, pe fakapipiki ʻi ha ʻū fakatātā ʻo e meʻa ʻoku mahuʻinga kiate koé, ʻi ha laʻipepa.

11–17 ʻAokosi: Tokāteline mo e Ngaahi Fuakava 88

Ako mo Akoʻi

ʻOku akoʻi mai ʻe he folofolá ʻoku totonu ke tau feinga ke ako ki he lahi taha te tau lavá (vakai, Tokāteline mo e Ngaahi Fuakava 88:118). Fakakaukau ki ha meʻa ʻokú ke fie ako lahi ange ki ai. Lau ha tohi fekauʻaki mo ia, ʻeke ki ha kaungāmeʻa, pe fai ha fekumi ʻaki ha tokoni mei ha mātuʻa. Tā ha fakatātā ʻo e meʻa naʻá ke akó pea vahevahe ia mo hoʻo fāmilí!

18–24 ʻAokosi: Tokāteline mo e Ngaahi Fuakava 89–92

Meʻakai mo e Fakafiefia

ʻOku finangalo ʻa e Tamai Hēvaní ke tau ʻai ʻa e meʻakai mo e inu lelei ki hotau sinó ke tokoniʻi kitautolu ke tau moʻui lelei! ʻOku ui ʻeni ko e Lea ʻo e Potó (vakai, Tokāteline mo e Ngaahi Fuakava 89). Tokoni ke faʻu ha founga feimeʻatokoni ʻokú ke saiʻia ʻaupito ai ʻa ia ʻoku ʻi ai ha fuaʻiʻakau pe vesitapolo ai. Kole ki ha taha lahi ke tokoni atu ʻi he feimeʻatokoní!

25–31 ʻAokosi: Tokāteline mo e Ngaahi Fuakava 93

Maama mo e Moʻoni

Kofuʻi ha kasa ʻaki ha ʻū laʻipepa kehekehe. Toʻo ha laʻipepa ʻe taha ʻi he taimi kotoa pē ʻokú ke lau ai ha taha ʻo e ngaahi potufolofola ko ʻení: Tokāteline mo e Ngaahi Fuakava 93:24, 28, 37. Talanoa fekauʻaki mo e founga ʻoku ʻomi ai ʻe he folofolá ʻa e māmá kiate kitautolú.