Lako Mai, Mo Muri Au iTaviqaravi

Na Kalou e kacivi ira na bisopi kei na peresitedi ni tabana mera veivuke ena nodra qaravi na tamata ena nodra tabanalevu se tabana (raica na Vunau kei na Veiyalayalati 72:2). Kotiva laivi na uto pepa ka vola na veika o taleitaka me baleta na nomu bisopi se peresitedi ni tabana ena kena yadua. Vakabira na uto kina katuba ni nodra valenivolavola se vale.

Ena dua na siga eda na rawa ni bula ena matanitu vakasilesitieli vata kei Tamada Vakalomalagi, o Jisu Karisito, kei na noda matavuvale (raica na Vunau kei na Veiyalayalati 76:62, 70, 92). E vakatauvatana na ivolanikalou na matanitu vakasilesitieli kei na matanisiga. Vakayagataka edua na peleti pepa se tiki ni pepa me cakava kina edua na matanisiga. Kotiva eso na pepa tututolu mera rarama ni matanisiga ka dregata se tepitaka ki na iwirini. Veivosakitaka na cava o rawa ni cakava oqo mo vakavakarau kina mo lai bula vata kei Tamada Vakalomalagi kei Jisu Karisito ena dua na siga.

Ena veidusimaki ni Kalou, a bulia kina o Jisu Karisito na veika bula kecega e vuravura (raica na Vunau kei na Veiyalayalati 77:2). Qitotaka e dua na qito ni vakilakila na manumanu! Me dua e cakava eso na imoimoi vaka manumanu. O ira na kena vo mera tovolea me ra vakilakila se manumanu cava oya. Ni o tukuna donu na manumanu oya, tukuna edua na ka o taleitaka kina.

Na Tamada Vakalomalagi e dau rogoca e veigauna na noda masu (raica na Vunau kei na Veiyalayalati 81:3). Lagata vata kei na nomu matavuvale na “Tamaqu Mai Lagi” (iVolanisere ni Gonelalai, 6). Tekivuna na sere mai vua edua ga na tamata. Me qai vakamalua na nodra curu mai na tamata kece. Ni oti nomudou lagasere, veivosakitaka na veika e rawa ni dou masulaka vakamatavuvale.