Sega Ni Vinaka Sara
Sa mai cava na siga vinaka sara nei Adeline!
E dua na italanoa dina mai Varanise.
Sa droinitaka oti o Adeline na iotioti ni kato ni itoqa ena nona pepa. E yasana, a vola kina o koya, Masu ena mataka kei na bogi.
“Na cava qo?” A taroga o Nana.
“Au cakava tiko edua na jekelisi me baleta na mataka,” a kaya o Adeline. “Au na rawata kina edua na siga e vinaka sara!”
Ea biliga cake o Nana na vacu ni matana. “O dina?”
A deguvacu o Adeline. “Ena Lalai keimami vulica kina me baleta na noda vakataucokotaki vei Karisito. Au na yaco meu vinaka vakaoti me na taucoko kina na noqu veisiga.”
“Au marau nio vinakata mo caka digidigi vinaka,” a kaya o Nana. “Ia o kila tiko, ni dua ga na tamata e vuravura ea uasivi sara—sai Jisu Karisito.”
A cegulevu o Adeline. “Au kila. Ia au vinakata vakaidina meu tovolea! Au nanuma niu rawa ni cakava.”
Ni mataka mai, a sa vakarau tu o Adeline. A lobika nona itutuvi ka cavuta nona masu ni mataka lailai.
Ena katalau, a veivuke ena vakani tacina lailai, o Sylvia. Ni sovara o Sylvia na kena piji ena nona idabedabe, a cegulevu o Adeline. A wili vaka va ka veivuke ena kena samaki.
E koronivuli, a vakasaqara o Adeline na tamata era gadreva na veivuke. A mavoa na qurulasawa i Lucas, ka mani kauta mai na tere ni kena ivakasigalevu vei koya.
Ni biubiu tiko mai koronivuli, a matadredredre vakalevu sara o Adeline vua na marama ka dolava tu na matamata ni koronivuli. E dau mata cudrucudru tu ga na marama oqo. Ia nikua a dredre lesu mai!
Ni oti na vuli, a solia o Adeline vei Sylvia na nona manumanu taleitaki me vakatatalo kina. Ka ni bera ni laki moce, a cavuta edua na masu. A toqa laivi na veika eso ena nona lisi ka curu kina nona itutuvi. Ea dokadokai koya ka oca sara vakalevu. Sa vakarau tu o koya kina dua tale na siga vinaka sara ni mataka!
Ni yadra mai o Adeline ena siga ka tarava, era a kabuwacara tu ena vuloa na nona matakau kece. A taura tu o Sylvia edua ka domica tiko. E rairai a dreti ira kece mai ki tuba!
“Sylvia!” A kailavaka o Adeline. “Au a tukuna vei iko mo kakua ni tarai ira na noqu matakau!” A dreta mai na matakau a taura tiko o Sylvia. A tagi o Sylvia ka cici yani.
A raikivita o Adeline na nona jekelisi ena katuba. Ea luvuci na lomana.
A curu mai o Nana ena gauna sara ga e vakila kina o Adeline na wainimatana e baluna.
“Na cava e yaco?” A taroga o Nana.
“Au guilecava meu cavuta na noqu masu. Au sega ni samaka na noqu imocemoce.” Ea veitubuyaki na domoi Adeline. “Kau a cuduvi Sylvia. Sa mai cava na noqu siga vinaka sara!”
A mokoti Adeline o Nana. “E dredre meda na uasivi sara ena veigauna kece. Ia na kena dina, ena sega ni rawa.”
A mataveveku o Adeline. “Ia meu na qai vakataucokotaki vakacava vei Karisito?”
“Qori sara ga! Eda na sega ni rawa ni vakataucokotaki ke sega o Jisu Karisito,” a kaya o Nana. “A solia na Nona bula ena vukuda baleta ni kila na Tamada Vakalomalagi nida na caka cala ka na gadreva na veivuke. E taura o Jisu na noda sasaga malumalumu ka vakavinakataka cake.”
A vakasamataka o Adeline na ka oya. “Kena ibalebale niu na sega ni rawata na veisiga vinaka sara e veisiga?” a taroga o koya.
A kurea na uluna o Nana. “Sega. O na sotava na veisiga dredre. Ia o na sotava talega eso na siga vinaka.” A bukia o Nana na drau ni ului Adeline e daku ni daligana. “Nomu tovolea na nomu vinaka taucoko sai koya na ka e bibi. Kevaka mada ga e tekivu edua na siga ena digidigi cala, e rawa nida dau masulaka me da veivutuni ka tovolea tale. Ena veivuke nei Jisu Karisito, o na vinaka kina.”
A vakila o Adeline na katakata ni lomana.
“Oqo, me baleta na nomu lisi.” A dusia na lisi o Nana. “Vakacava me daru vakanamata ga ki na dua na ka?”
A raica o Adeline na nona lisi. A dresuka laivi e dua na tiki ni pepa oya ka vakabira lesu na kena vo ki na katuba. Na ka e vo tiko e kea e tukuna, Masu ena mataka kei na bogi.
A matadredredre o Adeline. “Ea sega beka ni tekivu vinaka sara na noqu siga, ia au se rawa tikoga ni masu ena gauna oqo. Ka ena veivuke nei Jisu Karisito, sa na rauta vinaka!”
Droini mai vei Giovanni Abeille