Na iWali ni Leqa
“Vacava ke daru tea eso na vunikau?” A taroga o Cristal.
E dua na italanoa dina mai Ajenitina.
“E rawa beka ni daru lako ki na plaza?” A taroga o Cristal na ganei Ivan.
A rai yani ki tautuba o Ivan. “Io e rawa,” a kaya o koya. “Ia ena vinaka me daru wawa me yacova ni malumu sobu na matanisiga. Sa katakata dina.”
Na plaza oqo edua na lomanibai levu ni co volekata na nodratou vale. Erau dau taleitaka na qitora na veitara se veivuni e kea vata kei ira na nodrau itokani. Ia e sega ni dua na vanua rurugu e tiko kina mera vakaruru kina mai na katakata. Ka ena vulaikatakata oqo, e a dua dina na leqa levu.
A galu mada vakalailai o Cristal. Qai kaya mai, “Vacava ke daru tea eso na vunikau? Ena qai tiko kina na ivakaruru ena plaza. Eda na qai rawa ni qito kina ena gauna mada ga e katakata kina!”
A matadredredre o Ivan. “Au taleitaka na vakasama qori!”
Rau a tukuna o Ivan kei Cristal vei Papá na nodrau ituvatuva. “Au na kerea na veivakadonui mai na siti,” a kaya o koya.
Ni oti e vica na macawa, a soli na veivakadonui rau gadreva ka vakarau sara me rau tekivu! A kauti Ivan kei Cristal o Papá ki na vunikau levu ka tubu tu ena daku ni nodratou vale. Ena ruku ni vunikau, era tubu tu kina eso na ibinibini vunikau lalai.
“Ni se na vunikau levu, ena vakalutuka na sorenikau kina qele,” a vakamacalataka o Papá. “Sa na qai tubu mai kina na veivunikau lalai. Era vaka na cakamana lalai ni veika bula!”
A vakaraitaka vei rau o Papá na sala me rau kelia vakavinaka kina na vunikau lalai. Rau a tei ira vakamalua o Ivan kei Cristal ena vokete ni senikau.
Ena dua na yakavi ni Vakarauwai ni rurugu tu na matanisiga, rau a vakavodoka o Ivan kei Cristal na vunikau lalai kina dua na qiqi. Rau a biliga yani vakamalua kina plaza. Eratou veivuke na taci Ivan gone kei na ganena ena kena kau na vokete wai. Rau a kauta mai o Mamá kei Papá eso na isivi.
Eratou a digitaka vata na vanua me tei kina na vunikau yadua. Eratou a kelia eso na qara ka tea na vunikau yadua ena loloma. A vakaraitaka vei iratou o Mamá na sala ni kena keli na ikeli wavokita na veivunikau mera vakasuasuataki kina. “Era gadreva na vunikau na rarama ni matanisiga, wai, kei na kakana bulabula mera tubu kaukauwa kina,” a kaya o koya. “Me vakataki ira ga na gone!”
A vakasamataka o Ivan na vunikau ena daku ni nodratou vale ka raitayaloyalotaka sara na kedra irairai na vunikau ena dua na siga mai muri. “O vakabauta beka?” a kaya o koya. “Ena dua na siga era na balavu cake mai vei kedatou na vunikau oqo!”
Ena vulaitubutubu, era na qoroya na tamata kece na senikau totoka, ramase piqi era na seraka mai. Ena vulaikatakata, ena robota na lomanibai oya na rurugu. Ena vulaimago, ena ubia na qele na draunikau me vaka edua na ibe vavaku dromodromo.
Ena veisiga, erau dau sikova na plaza o Ivan kei Cristal me rau dikeva na veivunikau. Erau raica me veirauti na wai kei na vunikau yadua. Ena veigauna kece e kadre kina edua na draunikau se tabana vou, era dau qoroqoro. Sa saumi na nodrau cakacaka vakaukauwa!
E marau o Ivan ena nona vakananumi ira na tamata kece era na marautaka na rurugu ena plaza ena dua na siga. A veivuke o koya me cakava na vuravura me dua na vanua totoka cake vei ira kece na luvena na Tamada Vakalomalagi.
Droini mai vei Colleen McKeown