Na Lotu Vou nei Jamesi

Mai vei Lucy Stevenson Ewell

A duidui na ka e vakila eke o Jamesi mai na ka edau vakila mai na nona lotu.

E dua na italanoa dina mai Viti.

A lako yani o Jamesi kina vanua vakabai ka dau maroroya tu kina na vuaka na nona matavuvale. “Qo na kemuni.” A viritaka vei ira eso na kakana, ka ra kudru ena marau na vuaka.

Sa qai kauta o Jamesi eso na tavaya wai savasava kina paipo e tautuba. A drodro na wai batabata ki loma ni tavaya ni dolava o koya na paipo. Na nona vakani ira na vuaka kei na nona taki wai me baleta na nona matavuvale sa ikoya na sala e veivuke kina e veisiga.

“Jamesi!” A kaci o Nana. “Sa vakarau mo lai lotu?”

A sogota na paipo ni wai o Jamesi ka kauta i loma ni vale na iotioti ni tavaya bibi. “Au sa qai vakarau qo.”

Ena vei Sigatabu kece na matavuvale nei Jamesi edau lai lotu kina dua na lotu Vakarisito ena nodratou tauni. Dau taleitaka o koya ni vulica na veika baleti Jisu Karisito.

Sega ni dede o Jamesi kei rau na ganena gone, o Unaisi kei Marama, eratou sa taubale tiko kei na vo ni nodratou matavuvale ki lotu. E vica na toa lakosese era a tagi toka ena gaunisala.

Duri tu na matavuvale e mata ni dua na vale ni lotu

Ia ni ratou yaco yani ikea, a sogo tu na katuba. “Au guilecava ni na sogo na lotu ena macawa oqo kei na macawa mai oqo baleta ni sa lako na italatala,” a kaya o Tata.

“E tiko tale beka edua na lotu tou rawa ni lako kina?” a taroga o Jamesi. Ena rarawa o koya ke na sega ni lotu ena macawa oqo.

A vakasama vakalailai o Tata. “Io,” a kaya o koya. “Au vakabauta niu kila edua.”

Eratou a muri Tata lesu tale o Jamesi kei na nona matavuvale ki nodratou vale. Eratou a vodo kece ki na nodratou waqa kau lailai ena bati ni uciwai. A dabe mai muri o Tata me taura na idini.

Matavuvale ena dua na waqa kau lailai ka muria sobu na uciwai

Ea vakuru sobu na waqa ena uciwai. A vaqara o Jamesi na manumanu vuka era vunitaki tu ena veivunikau balavu drokadroka. Ni oti e 15 na miniti, eratou a raica edua na valenilotu lailai. A vaqo na kena ivakatakilakila, “Na Lotu i Jisu Karisito ni Yalododonu Edaidai.”

“Oqo na lotu au a vakasamataka tiko,” a kaya o Tata. A ulia yani na waqa ki matasawa, ka ratou sobu kece. Eratou a rawa ni rogoca na ivakatagi mai valenilotu.

E loma, a dabe vata kei rau na nona itubutubu kei rau na tacina o Jamesi. Eratou vakarorogo vei ira na vosa kei na sere. A vakila o Jamesi edua na katakata, kei na marau e lomana.

Ni sa oti na soqoni, a lako mai edua na marama vinaka me vosa vei iratou. “E tiko e dua na neitou kalasi ka vakatabakidua me baleti ira na gone,” a kaya o koya. “E vakatokai na Lalai. Dou vinakata beka mo dou gole kina?”

A raici rau na ganena o Jamesi. A rere vakalailai me lako kina dua na kalasi ka sega ni kila kina edua! E vinaka ni rau na lako tale ga kina na ganena. De dua ena lasa beka.

“Io,” a kaya o Jamesi.

“Tou lako!” A marau o Marama.

Eratou a muri koya na marama oqo o Jamesi kei rau na ganena gone kina dua na rumu ni kalasi. Ea levu kina na gone ka ra dabe toka ena idabedabe lalai, era veivosaki ka dredre tiko. Ni dabe sobu o Jamesi, era a matadredredre mai vua. Era gone vinaka kece!

Era laga sere, ka ra vukei Jamesi kei rau na ganena na vo ni gone meratou kila na qaqa ni sere. Oti sa qai dua na nodra lesoni me baleti Jisu Karisito. E duidui na ka e vakila eke o Jamesi mai na ka edau vakila mai na nona lotu. E dua na duidui vinaka.

Matavuvale mamarau e mata ni dua na valenilotu

Ni sa oti na lotu, eratou a vodo ki waqa na matavuvale nei Jamesi me lesu ki vale. A raica tale o Jamesi na ivakatakilakila ena taudaku ni valenilotu. E tiko kina na yaca i Jisu Karisito. O koya beka qo na Lotu i Jisu Karisito! A vinakata o Jemesa me muri Jisu.

“E rawa beka nidatou lako tale mai ki ke ena macawa mai oqo?” A taroga o Jamesi.

E rau a dredre o Nana kei Tata. “Keirau a vakasamataka tiko na ka vata oqori,” a kaya o Nana.

“Iei!” A kailavaka o Unaisi.

A dredre o Jamesi. E kila o koya niratou sa kunea edua na ka talei. Ka sa sega ni rawa ni wawa o koya me vulica e levu tale na ka.