Noda Vuravura Totoka

Keirau a kauta kei watiqu e vica na makubui keirau ki na dua na were totoka mai Varanise. Keitou qoroya na loga ni senikau totoka, na otalili, kei na veitobu.

Na were oqo a taukena tu edua na turaga na yacana o Claude Monet. O koya a dua na daudroini rogo. A cakacaka vakamaqosa sara ena nona iteitei me 40 na yabaki. A droinitaka e drau vakacaca na droini ka vakauqeti mai na nona were.

Na totoka ni veika bula e rawa ni vukei keda meda vakavinavinakataka na Tamada Vakalomalagi kei na Luvena, o Jisu Karisito. Erau a bulia na vuravura totoka oqo vata kei na veiulunivanua, veiuciwai, na kau, kei na manumanu.

Na veibuli totoka oqo era vakaraitaka na levu ni nona lomani keda na Kalou. Ia, era dau salavata mai kei kena itavi kei na ilesilesi. Oqo e vakatokai me ivakatawa. E dodonu meda vakatawa vinaka na veika sa bulia vei keda na Kalou.

E sureti keda talega na Tamada Vakalomalagi meda tomani Koya meda dau bulia na ka. E rawa nida buli droini, sere i vakatagi, kei na veika tale eso me vakamarautaka na noda bula ka vakalougatataki ira na tani.

E yalataka na Kalou na veivakalougatataki cecere nida lomana ka vakatawa vakavinaka na vuravura kei keda vakai keda. Nio vakayacora vakakina, ona vakila vakalevu cake na Nona loloma ena nomu bula.

Cakacaka ni Liga mai na Drau-ni-pepa

E vakavulica o Bisopi Caussé ni rawa talega nida dau bulia na ka! Oqo e dua na cakacaka ni liga o rawa ni cakava mo vakananuma kina vei iko na ibulibuli totoka nei Tamada Vakalomalagi.

1. Vakaraica edua na iyaloyalo ni dua na ka bula ka vakauqeti iko.

2. Ena dua na tiki ni pepa, vakayagataka edua na penikau ka droinitaka na veitiki duidui eso ni iyaloyalo.

3. Dresulaka na pepa rokataki me vakayagataki ena nomu iyaloyalo.

4. Vakabira na tiki ni pepa rokataki ena loma ni bai o vakarautaka tu.

Dolava na PDF

Droini mai vei Maddie Baker