Painia ena Veivanua
E Via Vakataki Lomalagi
“O vinakata beka mo lako mai ki lotu?” A taroga o Momo Reza.
Edua na italanoa dina mai Idia kei Kenada.
A lobika o Tahira na iotioti ni sote ka biuta e loma ni nona kato. Ea vakasosolo tiko me baleta edua na ilakolako me vakayagataka na vulaikatakata vata kei na nona nei kei na momo e Kenada. Ea marautaka ia a taqaya vakalailai. A yawa sara o Kenada mai na nona itikotiko mai Idia.
“Sa tiko vei iko na veika kece?” A taroga o Nana.
“Au nanuma ni vakakina.” A sogota o Tahira na nona kato.
“O na marautaka dina vakalevu. Nanuma mo solia vei Momo Reza kei Nei Misu erua na imoko levu mai vei au,” a kaya o Nana.
Ni sobu mai na waqavuka e Kenada o Tahira, a solia vei Momo Reza kei Nei Misu erua na imoko levu. “Oqo mai vei tinaqu,” a kaya o koya.
Eratou a vakayagataka na vica na siga ka tarava ena nodrau vakadikeva na siti kei na veivanua voleka. A sikova kina o koya na imatai ni nona vanua ni veivakamarautaki ka raici Niagara Falls kina. Ea ka ni lasa dina!
Ena yakavi ni Vakarauwai, a veivuke o Tahira me vakasaqari na kari toa vakabata me ivakayakavi. Ni ratou kana oti, a tarogi koya o Momo Reza ena dua na taro.
“O na vinakata beka mo mai lotu vata kei keirau ni mataka?” a taroga o koya. “Keirau lotu tiko ena dua na lotu Vakarisito. Keirau vulica e kea na veika baleti Jisu Karisito kei na Nona kosipeli.”
“Io,” a kaya o Tahira. O Nana kei Tata erau vakabauta edua tale na lotu, ia o Tahira a vuli ena dua na koronivuli curu i bure Vakarisito mai Idia. Na gole kina dua na lotu vou ena sega ni duidui sara.
Ena siga ka tarava, a dara o Tahira e dua na ivinivo a solia vua o nona nei me dara. Ni ratou yaco ivalenilotu ka curu iloma, era a lagasere kece tiko. A tu vakadua o Tahira ka vakaraici ira kece na tamata. Era dabe vata tiko na tina kei na tama kei ira na luvedra. Era rairai marau kece tiko. Ea totoka vakaoti na lagasere.
Oqo e via vakataki lomalagi sara ga, a vakananuma o Tahira.
A dabe sobu o Tahira ena dua vei ira na idabedabe vata kei Nei Misu kei Momo Reza. A sarava tiko na kena pasitaki na tere ni madrai kei na wai. A rogoci ira na vosa nira tukuna na veika baleti Jisu Karisito. Ka rogoca e levu tale na lagalagasere. Na iotioti ni sere ea baleta na nodra duavata na matavuvale me tawamudu. A taleitaka o koya na veika a vakila mai na veivosa oya.
Ni oti na iotioti ni masu, a vuki o Tahira vei Momo Reza. “Na cava na ibalebale ni meda tiko vata ka tawamudu?”
A dredre o Momo Reza. “Keimami vakabauta ni kevaka eda muri Jisu Karisito ka cakava ka maroroya na yalayala vata kei na Kalou, eda na rawa ni bula vata kece mai lomalagi kei na noda matavuvale—ena dua na siga.”
Ea vakila o Tahira na katakata ni lomana tekivu mai uluna kina iqaqalo ni yavana. A taleitaka o koya na vakasama me laki tiko vata kei na nona matavuvale me tawamudu.
Ni oti na lotu, a vakasamataka tiko ga o Tahira na ivakatagi totoka. A vinakata me vulica e levu tale na ka me baleti Jisu Karisito kei na matavuvale tawamudu. Sa mani nanuma me sota vata kei rau na daukaulotu. Ni toso tiko na veimacawa, a kila cake tiko mai vakalevu o Tahira ni dina na kosipeli.
A qiriti rau na nona itubutubu o Tahira me tukuna vei rau na ka sa vulica tiko. Sa qai tarogi rau ena dua na taro bibi. “E rawa beka niu papitaiso?” Erau a kaya io!
Ena siga a papitaiso kina, eratou a lagata o Tahira, Momo Reza, kei Nei Misu na sere “Au Luve ni Kalou.” A vakadewataka o Momo Reza me rawa ni ratou lagata ena vosa vaka-Idia. Na vosa vaka-Idia sai koya na vosa e vosataka o koya mai vale e Idia.
Ni lagasere o Tahira, a vakila na katakata e yalona. Ea vakataki lomalagi sara ga. E kila o Tahira ni ena vuku i Jisu Karisito, kevaka ena maroroya na nona yalayala vua na Tamada Vakalomalagi, ena rawa ni bula vata tale kei Rau ruarua ena dua na siga.
Droini mai vei Ekata Mandal