Kataranta atol sa Presentasyon
Langitnong Amahan, miampo siya, palihog tabangi ko nga makalma.
Usa ka tinuod nga istorya gikan sa South Africa.
Naglagubo ang kasingkasing ni Allyson. Hapit na iyang turno sa paghatag og presentasyon kabahin sa kasaysayan. Nagpraktis siya og makadaghan nga higayon uban iyang mama sa miaging gabii. Apan, mibati siya og grabe nga kakulba. Dili gayod niya gusto ang moistorya atubangan sa mga tawo!
“Ang sunod kay si Allyson,” si Mrs. Tanner miingon. “Palihog anhi aron epresentar ang imong report.”
Mibarog si Allyson gikan sa iyang lamesa ug gikulbaan nga milakaw padulong sa atubangan sa klase. Mitan-aw siya sa mga dagway sa iyang mga klasmeyt ug nagkurog nga miginhawa. Gipaningot ang iyang mga kamot. Iya kining gitrapohan sa iyang uniporme sa eskwelahan.
Gibuka niya iyang ba-ba aron sa pagsugod. Apan kalit lang wala na siya kabalo unsay iyang isulti. Ang tanan mitutok niya, naghulat unsay iyang isulti. Iyang gibati nga ang tanan nga mga pulong nga iyang gisag-ulo nasangit sa iyang tutunlan. Ang iyang tiyan daw nagdaguok.
Dayon nakahinumdom si Allyson og usa ka butang. Pipila ka semana ang milabay, iyang papa misugilon niya og usa ka istorya sa unsang paagi siya nag-ampo aron ang Espiritu Santo motabang niya.
Dali-dali nga nag-ampo si Allyson sa iyang hunahuna. Langitnong Amahan, miampo siya, palihog tabangi ko nga makalma ug mamaayo sa paghatag sa akong presentasyon. Sa ngalan ni Jesukristo, amen.
Sa dihang nahuman si Allyson pag-ampo, nabati niya nga ang kataranta nagsugod og kawala. Ang iyang mga abaga narelaks, ug gibati niya nga klaro na iyang panghunahuna.
Niining higayona sa dihang gibuka niya iyang ba-ba, ang mga pulong sayon na nga migawas. “Ang akong report bahin sa unang mga lumulupyo sa South Africa sa kapanahonan sa 1600,” miingon siya. Iyang gipakigbahin ang mga kamatuoran nga iyang gisag-ulo. Sa dihang duol na mahuman iyang presentasyon, iyang gibati ang kalipay nga mikaylap kaniya. Iyang nabuhat gayod!
Milingkod si Allyson nga may pahiyom sa iyang nawong. Iyang report dili perpekto, apan malipayon siya sa iyang nahimo.
“Hoy,” iyang amiga nga si Emily mihunghong gikan sa luyo sa iyang lamesa. “Maayo kaayo ka! Abi nako dili ka ganahan mosulti atubangan sa mga tawo.”
Hinay nga mikatawa si Allyson. “Mao sad akong hunahuna! Nag-ampo ko ug nangayo ko sa Dios og tabang, ug Iya kong gitabangan.”
Nahilom si Emily og kadiyot. Dayon mihunghong siya, “Wow, tingali kinahanglan mas mag-ampo usab ko.”
Samtang nagsugod ang sunod nga estudyante, naghunahuna si Allyson sa unsay bag-o lang nahitabo. Lahi kaayo iyang gibati human siya nag-ampo. Ang Espiritu Santo tinuod nga mitabang niya aron makalma og mahimong isog!
Nag-ampo og kadiyot si Allyson sa iyang hunahuna. Salamat, Langitnong Amahan, siya miampo. Salamat sa pagpadala Nimo sa Espiritu Santo aron sa pagtabang nako.
Paghulagway pinaagi ni Silvia Provantini