Pagpamatuod Panahon sa Meryenda

Ni Kate Anderson

May misantop sa hunahuna ni Zoe: Barogi ang imong gituhoan.

Usa ka tinuod nga istorya gikan sa Australia.

Batang babaye nga nagdala og sandwhich miagi sa duha ka batang babaye nga naglingkod atubangan sa lamesa sa lawak kan-anan

Panahon kadto sa meryenda sa eskuwelahan. Gikuha ni Zoe ang iyang sandwhich ug milakaw padulong sa lamesa. Ang sanag sa adlaw milapos sa bintana ug midan-ag niya. Init kadto nga adlaw, ug nalipay si Zoe.

Nag-istorya ang tanan, ug ang lawak-klasehanan saba sa malipayon nga mga bata. Usa ka batang babaye nga ginganlan og Luna milingkod sa iyang duol kauban sa iyang higala nga si Jesse.

“Kristiyano ka?” Nakadungog si Zoe nga nangutana ni Jesse.

Gibati ni Zoe nga nahadlok. Kanunay nga mosulti si Luna og masakit nga istorya! Unsay sunod niyang buhaton? Nahilom ang tibuok lawak-klasehanan samtang naminaw sila.

“Dili ko motuo ni Jesus,” misulti dayon si Luna.

Tagsa-tagsa, daghang mga bata sa klase ni Zoe misulti sa samang butang.

Batang babaye nga nahadlok, naglingkod atubangan sa lamesa ug naggunit og sandwhich

Nagkakusog ang kakulba ni Zoe. Gusto niya nga makabaton og kaisog ug mosulti nga nagtuo siya ni Jesukristo, apan nahadlok siya kon unsay mahitabo. Unsa kaha ang hunahunaon sa uban? Mawad-an ba siya og mga higala?

Sa kalit lang mibati siya og mainit, malinawon nga pagbati. May misantop sa hunahuna ni Zoe: Barogi ang imong gituhoan. Panalipdan tika. Nasayod si Zoe nga nagagikan kini sa Espiritu Santo.

Batang babaye nga naglingkod sa lawak kan-anan nakig-istorya sa duha ka batang babaye

Miginhawa siya og lawom. “Nagtuo ko ni Jesukristo.” miingon siya. “Ug nahibalo ko nga gihigugma ko Niya. Nahigugma usab Siya nimo, bisan kon wala ka motuo Niya”

Ang init nga pagbati mianam og kakusog. Mibati si Zoe og nagkadako nga kalipay.

Sa wala madugay, nahuman na ang oras sa meryenda, ug panahon na nga magdula sa gawas. Malipayon nga naglakaw si Zoe padulong sa dulaanan nga hawanan. Misunod niya ang ubang mga bata sa klase.

“Ganahan ko sa imong gisulti ni Luna,” miingon ang usa ka batang babaye.

“Ako sab,” miingon ang laing batang lalaki. “Unsaon nako nga makatuo usab ni Jesus?”

Mipahiyom si Zoe. “Moadto ka sa Simbahan ug mobasa sa mga kasulatan aron makat-on pa og dugang mahitungod Niya! Ug makapaningkamot ka og maayo sa pagsunod sa unsay Iyang gitudlo.”

Nalipay si Zoe nga nakabaton siya og kaisog sa pagpakigbahin sa iyang mga gituohan. Nasayod siya nga anaa kanunay si Jesukristo aron motabang niya nga magmaisogon.