Dali, Sunod Kanako nga mga Kalihokan

Ang Manluluwas mihangyo ni Joseph Smith sa pagbutang og maayong mga basahon sa mga eskuwelahan sa Simbahan aron ang mga bata makakat-on unsa ang gusto Niya nga makita nila (tan-awa sa Doktrina ug mga Pakigsaad 55:4). Pagpili og paborito nga basahon o istorya. Pagpuli-puli sa pagbasa ug sa pagpakigbahin sa inyong nakat-onan.

Basaha ang Doktrina ug mga Pakigsaad 59:9-19 ug paghisgot kon sa unsang paagi kita mapanalanginan kon atong balaanon ang adlaw nga Igpapahulay. Dayon adto sa pahina 13 ug pagpili og buhatonon nga kalihokan.

Gusto sa Dios nga mainampingon kitang maghisgot mahitungod sa sagradong mga butang (tan-awa sa Doktrina ug mga Pakigsaad 63:64). Uban sa usa ka grupo, barog nga mag-alirong nga adunay usa ka tawo sa tunga, maggunit og mga kasulatan. Kana nga tawo mopiyong, motuyok, ug motudlo og usa ka tawo. Ang tawo nga iyang gipili mopakigbahin og kasulatan ngadto sa tanan.

Ang Ginoo gusto nga kita magbaton og andam nga kasingkasing ug hunahuna (tan-awa sa Doktrina ug mga Pakigsaad 64:34). Makagahin kita og panahon sa paghunahuna mahitungod ni Jesukristo aron mas makapaduol Kaniya! Pagkuha og bag o basket aron morepresentar sa inyong hunahuna. Sudli og mga butang ang bag nga makatabang ninyo sa paghunahuna mahitungod sa Manluluwas.

Diha sa mga kasulatan, atong makat-onan kon unsa ka importante ang “pagbaton og matinuoron ug matinud-anon” nga mga higala nga motabang nato sa pagsunod ni Jesukristo (tan-awa sa Doktrina ug Mga Pakigsaad 69:1–2). Paghimo og regalo aron ihatag sa usa ka higala! Mahimo kamong mag-paint og litrato, maghimo og bracelet, o magluto og para ipahalipay. Paghimo og mubo nga sulat nga ipauban sa inyong regalo aron sultihan ang inyong higala nga gihigugma ninyo sila.