Ang Problema sa Relo

Paspas nga giablihan ni William ang pakete nga may sulod nga sinaw bag-o nga relo. Miabot ra gayod! Mahinamon kaayo siya. Nagtrabaho siya og ayo aron makatigom sa kwarta nga ipalit niini, ug makalipay gyod kini.

Iyang gisul-ob ang relo sa iyang kamot ug nagsugod pag scroll sa screen niini. Daghan kaayo og makalingaw nga mga dula! Iyang gituplok ang dinosaur nga dula ug nagsugod sa pagdula.

Pagkasunod adlaw sa recess, gipakita ni William iyang relo sa iyang higala nga si Liam. “Hooah, di basta-basta!” Miingon si Liam. Mitan-aw siya ni William nga nagdula niini og pipila ka minutos. Dayon nangutana siya, “Gusto ka magdula na og kickball?”

“Tingali unya na,” miingon si William. Midagan si Liam aron magdula, ug si William milingkod ilalom sa kahoy aron magdula sa dinosaur nga dula.

Sa recess sa sunod adlaw, nagdula usab si William sa iyang relo. Midagan si Liam paingon niya. “Moapil ka ba sa dula?”

Mihangad si William gikan sa iyang relo. “Dili, gusto ko nga mopadayon pagdula niini nga dula. Tingali unya na.”

Nagmug-ot si Liam. “Pero sige man ta og dula og kickball sa recess!”

“Gusto lang nakong humanon kini nga dula,” miingon si William.

Mitalikod si Liam ug milakaw palayo.

Mao gihapon ang nahitabo sa sunod adlaw. Ug sa sunod adlaw. Sulod sa bus nga mohatod nila sa ilang balay, si Liam mitupad ni William. “Nganong wala man ka nakigdula namo karong adlawa?”

“Nagdula lang man ko og dali nga dula sa akong relo,” miingon si William. “Hapit na gayod nako maabot ang sunod nga lebel.”

Gikyugpos ni Liam ang iyang mga bukton. “Nagsige lang ka og dula sa imong relo. “Wala na gayod ka makigdula namo!”

Mibati si William nga namula ang iyang nawong. “Ang recess mao lang ang panahon sa eskwelahan nga makadula ko sa akong dula,” miingon siya. Ang iyang tingog nagsugod na og kadako. “Makabuhat ko sa unsay akong gusto sa panahon sa recess!”

Si Liam nasuko. “Ah, kon mao dili na kita amigo!”

Wala mitingog si William human niana. Mitan-aw siya sa bintana aron dili makita ni Liam ang iyang nawong. Ang iyang mga mata nagluha.

Sa dihang miabot na ang bus kon asa manaog si Wliiam, midagan siya og paspas kutob sa iyang mahimo. Mihapla siya sa sopa ug nagsugod sa paghilak. Naghunahuna siya nga wala na lang unta niya gipalit ang relo.

“Unsay problema?” Nangutana si Mama.

Nagbakho si William. “Miingon si Liam nga dili na daw mi amigo kay sige ra ko og dula sa akong relo.”

Si Mama milingkod tupad niya. “Morag naghunahuna siya nga mas gipalabi nimo imong relo kay kaniya.”

“Dili kana tinuod!”

“Kahibalo ko nga importante nimo si Liam.” Gigakos siya ni Mama. “Apan ang paggamit nato sa atong panahon mopakita unsay atong gihunahuna nga labing importante.”

Naghunahuna si William sa makadiyot. “Mas importante ang mga tawo. Pero dili ba pwede magdula usab ko sa akong relo?“

“Makahunahuna ka ba og paagi nga mabuhat kana?“ Nangutana si Mama.

Mitando si William. “Seguro makadula ko og kickball uban ni William atol sa recess, ug magdula lang sa akong relo makadiyot sa dihang makauli nako sa balay gikan sa eskwelahan.“

“Nindot kana nga ideya.”

Sa sunod adlaw sa eskwelahan, nakit-an ni William si Liam sa recess. “Pasayloa ko sige ra ko og dula sa akong relo,” miingon siya. “Mahimo bang makigdula ko og kickball uban nimo pag-usab?”

Mingisi si Liam. “Sige ba!”

Sa dihang iya nang turno, gipatiran ni William ang bola og kusog og midagan og paspas kutob sa iyang mahimo. Iyang madungog si Liam nga nag-cheer.

Makahulat ang iyang relo. Nindot iyang paminaw nga uban niya iyang higala.

Abrir PDF

Mga Paghulagway pinaagi ni Melissa Manwill Kashiwagi