Imong Sinulat

Dugangan og Gahom ang Pag-ampo

Ni Noah W., edad 10, Utah, USA

Mga magnet sa refrigerator nagpakita og usa ka batang lalaki nga nag-ampo, usa ka bitoon, ug usa ka slice sa French toast

Ang Dominggo sa buntag maoy labing maayo kay nagpasabot kini nga adunay cinnamon French toast! Gipasugkay ko sa akong mama sa binatil ug gipabutang ang French toast sa kaha. Mao ning usa ka pamahaw nga makalipay gyod nako.

Usa ka Dominggo, nakabantay ko nga hilom kaayo ang kusina. Wala nako mapanimaho ang cinnamon nga mokanap sa hangin sa tibuok balay sa ubang mga Dominggo. Mao kadtong higayona nga nakita nako: ang makalilisang nga pahibalo nga nakasulat sa pink nga papel diha sa fridge. Nag-ingon kini, “Dominggo sa Puasa.”

Migawas si mama aron pahinumdoman mi nga Dominggo kadto sa pagpuasa. Naguol kaayo ko. Gusto gihapon ko og French toast!

Gipalingkod ko ni mama sa sopa ug gigakos ko niya. Gisultihan ko niya nga ang pagpuasa makatabang sa among relasyon sa Dios ug makapaduol namo ngadto ni Jesukristo. Nahibaloan usab nako nga ang pagpuasa maoy usa ka paagi sa pagpalig-on sa atong mga pag-ampo. Sama kini sa paghatag og dugang gahom sa atong pag-ampo.

Wala koy ideya nga espesyal diay kaayo ang pagpuasa. Sa kalit lang mibati na sab ko og kadasig. Apan niining higayona dili kadto bahin sa French toast. Bahin kadto sa pagpuasa! Nagpasalamat ko ni mama ug midagan og balik sa akong lawak. Milingkod ko ug naghunahuna ko kon para kang kinsa ang akong puasa nianang adlawa. Kinahanglan akong himoon ang labing maayo kay dili lamang kini bisan unsa nga pag-ampo. Usa kini ka pag-ampo nga modugang og gahom, usa ka pag-ampo nga makapalig-on kay nagpuasa ko.

Miluhod ko ug nagsugod sa akong puasa. Dihang nahuman na ko sa pag-ampo, maayo kaayo ang akong gibati, ug wala na ko gutoma. Gigakos nako ang akong mama, ug misulti nga salamat sa pagtudlo nako bahin sa pagpuasa. Mibati ko og kalinaw sa tibuok adlaw. Sa dihang natapos na ang adlaw, akong gitapos ang akong puasa pinaagi sa pag-ampo. Labihan ka lami ang pagkaon!