Ang Naguba nga Kwadro

Misulod si Erica sa lawak sa iyang mga ginikanan ug mitan-aw sa hulagway nga anaa sa bongbong. Hulagway kadto ni Jesukristo. Kadaghan na siya nakakita niini sa una, apan karon duna siyay nabantayan.

“Hala, Pa? Diin gikan kini nga litrato? Ug nganong naguba man ang kwadro niini?”

Mihangad si Papa nga naghipos sa higdaanan. “Kang Oma kana nga litrato.”

Si Oma mao ang iyang apohan nga babaye nga nagpuyo sa Holland. Ganahan si Erica nga maminaw sa iyang Papa nga mag-istorya mahitungod sa kinabuhi ni Oma.

Milingkod si Papa sa higdaanan tapad ni Erica. “Midako si Oma ug mipalayo sa panimalay aron mahimong nars, ang iyang inahan mihatag kaniya niini nga painting,” miingon siya. “Gibitay kini niya sa iyang lawak. Usa ka adlaw nahulog kini gikan sa bongbong, ug nabuak ang kanto. Wala kini niya mapaayo, ug guba na kini sukad niadto. Dayon sa dihang midako ko ug mipalayo sa panimalay, gihatag kini ni Oma ngari kanako.”

Nangutana si Erica, “Nganong wala man nimo kini ayoha?”

“Makaayo ko niana,” miingon Papa. “Apan maayo kini nga pahinumdom. Nakatabang nako aron mahinumdom nga bisan kon usahay bation nako nga nasakitan o naguba, si Jesukristo makatabang kanato. Ug makapahinumdom kini nako nga nakaila Siya ug nahigugma sa atong pamilya.”

Gibati ni Erica ang kainit sa kasingkasing samtang gitan-aw niya pag-usab ang hulagway. Nindot pamation nga mahibalo nga ang Ginoo naghunahuna sa iyang pamilya.

Pipila ka adlaw ang milabay, nag-andam si Erica sa pagkatulog. Iyang gitopbrasan ang iyang ngipon ug nagsul-ob og pajama. Sa pipila ka minuto, mosulod si Papa aron maminaw sa iyang pag-ampo sa dili pa matulog ug ipahimutang siya og tarong sa higdaanan.

Apan dayon may nadungog si Erica. Ang iya kadtong igsoong lalaki nga si Tate sa sulod sa iyang lawak sa tupad nga pultahan. Nakig-istorya siya ni Papa, ug morag naghilak siya.

“Walay ganahan nako,” nadunggan niya si Tate nga nagsulti samtang nagbakho.

Naghunahuna si Erica bahin sa hulagway ni Jesukristo nga anaa sa guba nga kwadro. Naghunahuna siya bahin sa gisulti ni Papa mahitungod sa Manluluwas nga makatabang kon mobati kita nga nasakitan o naguba. Morag gibati ni Tate nga nasakitan karon, naghunahuna siya.

“Gihigugma ka nako. Ugma mahimong mas maayo na,” nadunggan niya si Papa nga nagsulti ni Tate. “Mosulti ko og goodnight ni Erica. Mobalik ra dayon ko.”

Sa dihang misulod si Papa sa iyang lawak, nangutana si Erica, “Nganong naghilak si Tate?”

“Ang uban niyang mga higala sa eskuwelahan nagsulti og makapasakit nga mga butang ngadto niya” miingon si Papa.

Nagmug-ot si Erica. Dayon nakaideya siya. “Mahimo ba kitang mag-ampo og dungan niya?”

Mipahiyom si Papa. “Morag ganahan ko niana.”

Hinay nga mituktok si Erica sa pultahan sa lawak ni Tate ug milantaw sa sulod. Tate? Mahimo ba modungan mi nimo sa pag-ampo?”

Mihingos si Tate ug gipahiran ang iyang mga mata. “Sige.”

Miluhod si Erica, Tate, ug si Papa, ug si Erica ang nag-ampo. “Langitnong Amahan,” miingon siya, “palihog panalangini si Tate. Tabangi siya aron mahibalo nga gihigugma siya ug espesyal siya.”

Sa dihang nahuman na siya, nagginaksanay si Erica ug si Tate. “Salamat,” mihunghong siya.

Dayon mibalik si Erica sa iyang lawak kuyog ni Papa. Samtang iyang gipahiluna si Erica sa higdaanan, miingon siya, “Nalipay ko nga mihangyo ka nga mag-ampo ta og dungan ni Tate. Unsay nakahatag nimo sa ideya nga mag-ampo og dungan niya?”

“Gibati nako ang kaguol dihang nakadungog niya nga naghilak,” miingon si Erica. “Ug naghunahuna ko bahin sa kang Oma nga litrato ni Jesukristo nga anaa sa guba nga kwadro. Naghunahuna ko nga kinahanglan makahinumdom si Tate nga bisan kon nasakitan siya, si Jesus nahigugma ug naghunahuna niya.”

“Nindot kaayo kana nga pahinumdom,” miingon si Papa. “Nahibalo ko nga nahigugma siya ug naghunahuna usab siya nimo, langga.”

Gihalokan siya ni Papa sa iyang ulo ug gipalong ang suga. Nagbukot siya sa iyang habol. Mapasalamaton siya nga si Jesukristo anaa kanunay aron motabang sa iyang pamilya.

PDF 열기

Mga paghulagway pinaagi ni Alyssa Tallent