“Na iLakolako Vakavuli Vakasakiti,” iTokani, Me 2025, 40–41.
Na iLakolako Vakavuli Vakasakiti
“Daru lako tani mai na ilawalawa,” a kaya o Ralph.
E dua na italanoa dina mai Qana.
A cici yani o Nyamedo ki na basi kei na tacina lailai, o Kwame. Erau a kabata na ikabakaba ka dabe tikiva edua na katubaleka. A rai yani ki tautuba o Nyamedo ka raica na matanisiga ni cilava tu na veivunikau drokadroka. A lako tiko na nodrau koronivuli ena dua na ilakolako vakavuli ki na dua na veikau maroroi. Nikua sa na dua na siga taleitaki!
“Ei, Nyamedo!”
Erau dabe sobu na itokani nei Nyamedo o Ralph kei Sierra ena idabedabe veibasai mai vua.
A dreta o Ralph na liga ni sote nei Nyamendo ka vakasolokakanataka yani. “Nida yaco yani ki na vanua ni gade, tou na lai vakadidike!”
“Io!” A kaya o Sierra. “E rawa ni dua ga na nodatou ilakolako marautaki.”
A deguvacu ena marau o Ralph. “E rawa ni tou dro ni bera na imatai ni itaviqaravi.”
A raitayaloyalotaka o Nyamedo na veika kece eratou na rawa ni raica ena lekutu. Vunikau balavu, manumanu totoka, kei na waisavu tale beka ga!
“E vaka mena ka ni lasa qori! Tou cakava,” a kaya ena matadredredre.
Ni yaco yani na basi ki na veikau maroroi, rau a sobu vata o Nyamedo kei Kwame. Eratou a tukuna na nodratou qasenivuli vei ira kece mera tiko vata ga vakailawalawa ka kakua ni dua e lako tani.
A lako o Ralph vei Nyamedo. “O nanuma tiko na ituvatuva?” A vakasolokakanataka o Ralph.
A deguvacu o Nyamedo. Ia a qai tuvakadua me vakasamataka. E rogo taleitaki na vakadikeva na lekutu, ia a kila talega o Nyamedo ni rawa ni rerevaki. Vakacava ke ratou yali se mavoa?
Vakasauri ga, a vakila o koya edua na domo ni vosa vua. Tiko vata kei Kwame.
E a rogo malumu ka lailai. Ea kila o Nyamedo ni oya na Yalo Tabu.
Ea leqataka de rau na cudruvi koya na nona itokani ni sega ni lako vata kei rau. Ia de rairai beka sa taqomaki koya tiko na Yalo Tabu.
A vuki o Nyamedo vei Ralph. “Vosota, sa dodonu vei au meu na tiko vata ga kei taciqu,” a kaya. “E noqu itavi meu raici koya.”
A vakaveveku mata o Ralph.
“Ia o a kaya nio na lako!”
“A kaya na qasenivuli meda tiko vata ga,” a kaya o Nyamedo. A cegulevu o Ralph ka lako tani.
Erau a lako vata kei ira na vo ni gonevuli o Nyamedo kei Kwame ka muri iratou na nodrau qasenivuli. Taumada era a gole ena vakalilili e macawa. Ea roba na matadra na cagi nira nawa tiko e dela ni veivunikau drokadroka ramase. Ea vaka na vuka tiko e macawa!
Tarava oya, o ira na cakacaka e kea era a vakavulici ira me baleta eso na manumanu era vakaitikotiko e kea. Erau a sega ni via wawa o Nyamedo kei Kwame me rau raici ira. Era vulica na veika baleta na sebara, maqe, gata, anitilopi, kei na veimataqali manumanu vuka! Ni oti na nodra raica na veimanumanu totoka, era sa qai lai kaba ulunivanua ka vodo ose. E muri era a qai qito.
A marau o Nyamedo ni a tiko vata mai kei Kwame. Ke a sega, ke a calata o koya e vuqa sara na veika lasa!
Ni sa gauna ni vodo tale ki na basi, a raici Ralph kei Sierra o Nyamedo. Erau cici yani vua.
“Voleka sara ni keirau vakasavi mai vei ira na maqe cudrucudru,” a vakasolokakanataka o Ralph. Ea laurai vua ni rere vakalailai. “Ea rawa ni keirau mavoa.”
A deguvacu o Sierra. “A vinaka nio a sega ni lako.”
“Oo,” a kaya o Nyamedo. “Au marau nidrau sega ni mavoa!”
Na Yalo Tabu a taqomaki koya tiko vakaidina, a vakananuma o koya. A taura na ligai Kwame ni rau vodo vata ki na basi.
Ea vakavinavinakataka ni a taqomaki rau tiko na Yalo Tabu ka vukei rau merau marautaka na gade.
Droini mai vei Cam Kendall