Na Wasei ni Rarama

A kaba cake o Ángel ena kareti e yasai Papá. Era a taqiri vakamalua na tavaya sucu ena daku ni qiqidreti ni cici yani ki liu na ose. Ea cila tiko na matanisiga, ka vakananumi koya sara ena nona sere taleitaki.

“Meu rarama i Jisu,” a lagata o Ángel.

A papitaiso o Ángel ena vica na vula sa oti. Erau a papitaiso talega o Mamá, kei na tacina lailai, o Oscar. A sega ni lewena na Lotu o Papá, ia a marau ena vukudratou. E se nanuma tiko ga o Ángel na ka a vakila ni cabe mai wai. A vaka na kena vakilai na katakata ni matanisiga e dakuna, ia e lomana.

A lagasere tiko ga vakataki koya o Ángel ni vakelea na qiqidreti o Papá ena vale nei Señora Perez. A kevu sobu o Ángel ka taura mai edua na tavaya sucu mai na muamuri ni qiqidreti. O Señora Perez ea dua vei ira na dau voli sucu vei iratou.

“Volivolitaki!” a kaya o koya.

A cakacaka tiko o Señora Perez ena nona iteitei. “Vinaka vakalevu,” a kaya o koya, ni taura na tavaya. A solia vua eso na ilavo siliva. “Na sere cava o a lagata tiko?”

A vakila o Ángel ni sa raragi mai na baluna. A sega ni kila o koya ni a rogoci koya o Señora Perez!

“Oqo e dua na sere mai na noqu lotu,” a kaya o Ángel. “Na Lotu i Jisu Karisito ni Yalododonu Edaidai.”

A matadredredre o Señora Perez. “Na cava o sega ni tukuna kina vei au edua na ka me baleta na nomu lotu?”

Ea galu vakalailai, ni a sega ni kila o Ángel na ka me tukuna. A qai kaya, “Keimami vakabauta ni lotu vata ga a tauyavutaka o Jisu Karisito ena Nona a mai bula e vuravura sa tiko tale qo.”

“Talei dina,” a kaya o Señora Perez. “Au se bera mada ni rogoca me dua na lotu e vakabauta oya.”

“De dua e rawa nio lako mai ena dua na gauna,” a kaya o Ángel. “Me dua na siga vinaka vei iko nikua!” A qai cici lesu vei Papá me veivuke ena kena veisoliyaki na vo ni sucu.

Ena mataka lailai ni Sigatabu, a yadra mai o Ángel. Ea rogoci Mamá e valenikuro ni vakarautaka tiko nai katalau.

“Oscar,” a kaya o Ángel, “sa gauna ni vakavakarau ki lotu!”

Rau a dara na nodrau isulu ni lotu o Ángel kei Oscar ka rau vakarau biubiu. E voleka ni rua na maile na kena yawa na valenilotu. Sa dua na taubale balavu, ka rau mani biubiu totolo sara.

“Me dua na gauna vinaka nikua,” a kaya o Papá ni rau biubiu.

Nirau taubale tiko, a vagugutaka tale o Ángel na nona sere taleitaki. A vagugu tiko nirau lako sivita na veivale ka a solia kina na sucu. A vagugu tiko nirau lako sivita na teveli ni volitaki vuanikau ena makete. Ka vagugu tiko nirau lakova yani na gaunisala ka tiko kina na valenilotu.

Nirau curu yani ki loma, a kurabui o Ángel. A sa tiko e kea o Señora Perez! A kauta mai o koya na nona matavuvale taucoko.

“O lako mai ki lotu!” A kaya o Ángel.

A deguvacu o Señora Perez. “Au a vakauqeti ena nomu sere,” a kaya o koya. “Au a qiriti tinamu me baleta na itikotiko ni valenilotu. Au vinakata meu mai vulica vakai au na veika me baleta na lotu oqo.”

A matadredredre o Ángel. A wasea na kosipeli o koya ena nona lagata ga edua na sere. Ea nuitaka ni na vakila talega o Señora Perez eso na rarama ni matanisiga e yalona nikua.

Atidaryti PDF

Droini mai vei Jomike Teijido