Na Kakana Tawaitini Tawakilai

“Na cava oqo, Nana?” A dreta mai o Seidi edua na tini levu mai na daku ni kovate. “E sega ni vakatakilakilataki tiko.”

“Au a guilecava qori,” a kaya o Nana. “Era sa yali na ivakatakilakila mai na so na kakana tawaitini, ka sa mani volitaki ira kina ena isau rawarawa na sitoa. Au a volia edua. Au nanuma ni rairai pi tawaitini.”

A vakawiwi mata o Seidi. E sega ni dau taleitaka na pi tawaitini.

A taura cake o Nana na tini ka vukica. “Sega ni dede era sa na ca. E vinaka cake medatou kania nikua.” A biuta na tini ena teveli.

“Na cava oya?” A taroga o Jesoni, na tuakai Seidi.

“O cei e kila?” A kaya o Seidi. “E nanuma o Nana ni pi.”

A kuretaka o Jesoni na tini. “E sega ni vaka na irorogo ni pi. Au kila ni bini.”

Oqori a solia vei Seidi e dua na vakasama. A taura eso na tepi kei na dua na peni ka vola “pi” ena dua na tiki ni pepa kei na “bini” ena dua tale. A vakabiri rau ki na tini.

A qai vakasama tale vakalailai ka vola “tomata soso” ena dua tale na tiki ni pepa.

Ena gauna vata qori a curu mai kina ki valenikuro o Tata. “Na cava e caka tiko?”

“Keitou qitotaka tiko edua na qito,” a kaya o Nana. “Kilakila mada se cava e tiko e loma ni tini.”

A taura cake o Tata na tini, kuretaka vakaukauwa, ka boica. “Masirumu!” a kaya.

Eratou a kudru kece. “E sega ni masirumu!” A kaya o Seidi. E ca sara oqori mai na pea, bini, kei na tomata soso. “Vacava medatou kolotaka laivi ga na tini.”

“O sega beka ni via kila na ka e tiko dina e loma?” a taroga o Nana.

A taura o Tata na idola ni tini. “E vakakina!”

Ni dolava o Tata na tini, a ubia na matana o Seidi. Ia ni dreta cake na kena isogo, a kurabui o koya. Ea sinai tu ena vuanikau kamica na tini.

“Yami!” a kaya o koya ni raica na pea, qerepi, jeri, kei na piji nira musulaki tu e loma.

A kauta mai o Jesoni eso na boulu kei na itaki. “Tou kana mada!”

A takiva o Seidi eso na vuanikau mai na tini ki na nona boulu. “Au sega ni vakabauta ni tou a cala kece,” a kaya. “Au a vakadeitaka ni a tiko edua na ka kana ca e loma.”

“Eda dau vakatakilakilataki ira beka na tamata vakaoya?” a taroga o Nana.

“Na cava na kena ibalebale?” A taroga o Seidi.

A biuta o Tata na nona boulu ena teveli. “Eda vakalelewa me baleta na kedra ituvaki e loma, ia eda rawa ga ni raica na veika e taudaku.”

A vakananuma o Seidi na ka oya. “Ni se vou o Samara e koronivuli, au a nanuma ni sega ni dau via veitokani. Ia au a qai kila ni a sega ni kila vakavinaka na noda vosa. Ia oqo keirau sa dau qito tu ga!”

“Oqori edua na ivakaraitaki vinaka,” a kaya o Nana.

“Ena so na gauna au dau vakila niu vakatakilakilataki,” a kaya vakamalua o Jesoni. “Era kaya na gone e koronivuli niu rawata ga na maka vinaka baleta ni taleitaki au o qasenivuli. Ia na ka dina, oya niu cakacaka vakaukauwa ka cakava taucoko na noqu lesoni e vale.”

“E rawa ni mosi na ivakatakilakila, se vakaevei?” a kaya o Tata.

A deguvacu o Jesoni.

A kania vakaoti o Seidi na kena vuanikau. “Ia era ca kece beka na ivakatakilakila? Ena sitoa ona gadreva mo kila na ka dina o volia tiko.”

“O dina,” a kaya o Tata. “Ia na gauna cava era vinaka kina na ivakatakilakila?”

A taura cake o Jesoni na nona itaki. “Ena gauna era dina kina!”

“Ia o cei e kila na ka dina e tiko ena loma ni dua na tamata?” a taroga o Nana.

“ Na Tamada Vakalomalagi,” rau a kaya vata o Seidi kei Jesoni.

Au sa taura rawa.” A kaya o Seidi. “O au edua na luve ni Kalou. Oqori na ivakatakilakila dodonu me baleti au.”

“Kei au,” a kaya o Jesoni.

“Kei au!” a kaya o Tata.

“Kei keda kece.” A matadredre o Nana. “E sega kina ni dodonu meda vakatakilakilataki ira na tamata ena veika eda raica e taudaku, se vakabauta na ivakatakilakila lasu e soli vei keda. Baleta ni Kalou duadua ga e kila na veika e tiko dina e loma.”

A volavola o Seidi ena dua na tiki ni tepi vou ka vakabira ena nona kote. “Edua na luve ni Kalou,” a kaya o koya. A matadredredre o Seidi. E taleitaka na ivakatakilakila oya mai vei ira kece.

پی ڈی ایف کھولیں

Droini mai vei Róisín Hahessy