Muria na Vosa ni Marau

Mai vei Bethany Bartholomew

E dua na italanoa dina mai Amerika.

“E rawa beka ni keitou lai droini ena joke?” A tarogi Nana o Quinn.

“Io!” A kaya o Nana. “Tou lako.”

Eratou a cici yani ki tautuba o Quinn kei tacina lailai kei ganena.

“Au vinakata na karakarawa!” a kailavaka o Quinn.

Rau a taura talega na joke o Kade kei Chloe. Eratou a dabe sobu ka tekivu droini e batinisala. A tomika cake o Nana eso na joke damudamu ka volavola.

Rokarokataki tiko na gonetagane lailai ena batinisala

“Na cava o cakava tiko?” a taroga o Quinn.

“Au vola tiko eso na vosa ni marau me baleti ira na gonevuli nira lako tiko i vale nikua,” a kaya o Nana.

E rawa ni raica o Quinn na koronivuli mai na katubaleka e liu. E dau taleitaka me yaloyalo vei ira na gone nira tavali.

“Na itukutuku cava tou rawa ni vola mera matadredredre kina?” a taroga o Nana.

Droinitaki kalokalo tiko e batinisala na gonelailai

A wiliwili o Quinn ni raibaleta tiko na taba i Nana. “O iko o…”

“Totoka!” A vakaotia o Nana.

A dredre o Quinn ka wiliwili tiko ga. “O iko o vakasakiti. O rawa ni cakava!”

Sa qai basika vei Quinn edua na vakasama. A qai droinitaka o koya edua na laini balavu ena dua vei ira na itukutuku nei Nana. A droinitaka edua na laini ki na kena e tarava. Ka qai lesu ki na dua tale.

Marama e vola tiko ‘O iko o uasivi duadua!’ ena joke ni volavola e batinisala

Na cava o cakava tiko?” A taroga o Nana.

“Au droinitaka tiko edua na laini mera lako kina na gone,” a kaya o Quinn. A tekivu cici o koya e dela ni laini. “Raica? Au vakaraitaka tiko vei ira na vanua mera kunea kina na vosa ni marau.”

“Au vakabauta ni oqori edua na sala vinaka mera vakadredrei kina na tamata kecega,” a kaya o Nana. Ka vakavuna me matadredredre cake kina vakalevu o Quinn.

Goneyalewa e droini tiko e batinisala e yasa ni dua na itukutuku ka tukuni kina ‘O rawa ni cakava!’