“Fil Trip Wokbaot,” Fren Mei 2025, 40–41.

Fil Trip Wokbaot

I kam long Abby Larkins

“Bae yumi ronwe long grup,” Ralph i talem.

Wan tru stori we i kam long Ghana.

Grup blong ol pikinini we oli stap stanap long fored blong wan ston saen

Nyamedo i ron kasem bas wetem smol brata blong hem, Kwame. Oli klaem ol step mo sidaon kolosap long wan windo. Nyamedo i lukluk i go aotsaed blong luk san i stap saen long ol grin tri. Skul blong olgeta i stap go long wan fil trip long bus we oli protektem. !Tedei bae hem i wan naes wokbaot!

“!Halo, Nyamedo!”

Ol fren blong Nyamedo, Ralph mo Seirra i sidaon long ol jea narasaed long hem.

Ralph i pulum set blong Nyamedo mo i wispa. “!Taem yumi kasem pak, bae yumi go lukluk gud ol samting!”

“!Yes!” Sierra i talem. “Bae yumi mekem wan wokbaot blong yumi wan.”

Ralph i saksakem hed blong hem blong agri wetem bigfala glad. “Yumi save ronwe bifo fas aktiviti i stat.”

Nyamedo i stap pikjarem ol samting we bae hem i luk long wael ples. !Ol tolfala tri, ol naes animol, mo ating !sam wotafol!

“!Hemia i naes tumas! Bae yumi mekem,” hem i talem wetem wan smael.

Taem bas i stop long bus we oli protekem, Nyamedo mo Kwame tufala i kamaot long bas tugeta. Tija blong olgeta i talem long evriwan blong oli stap wetem grup mo no aot long grup.

Ralph i wokbaot i go long Nyamedo. “?Tingbaot plan ia?” Ralph i wispa long hem.

Nyamedo i sakem hed blong hem blong agri. Afta hem i stop blong tingting. Blong go mo lukluk raon long wael ples bae i naes tumas, be Nyamedo i save tu se hem i no sef. ?Olsem wanem sapos oli lus o oli kasem kil?

Kwiktaem hem i harem wan kwaet voes i toktok long hem. Stap wetem Kwame.

I bin wan kwaet smol voes. Nyamedo i save se hem i Tabu Spirit.

Hem i wari se ol fren blong hem bae oli kros long hem from hem i no go lukluk raon wetem olgeta. MaetTabu Spirit i stap protektem hem.

Nyamedo i tanem hem i go Ralph. “Sori, mi mas stap wetem brata blong mi,” hem i talem. “From hem i responsabiliti blong mi”

Ralph i mekem fes blong hem i nogud.

“Be yu bin talem se bae yu kam!”

“Be tija i talem se bae yumi mas stap,” Nyamedo i talem. Ralph i pulum win mo wokbaot i go.

Boe stap swing long rop mo lukluk long wan pijin

Nyamedo mo Kwame tufala i go wetem ol narafala studen mo folem ol tija blong olgeta. Faswan oli swing long rop. Win i fas long fes blong olgeta taem olgeta i swing antap long ol grin tri. !I olsem we yu stap flae!

Boe i stap klaem long ston mo ron long baksaed blong hos

Nekis wan ol gaed blong bus ia oli tijim olgeta abaot sam long ol animol we oli stap laef long ples ia. Nyamedo mo Kwame tufala no save wet blong luk olgeta. Oli lanem abaot ol sebra, ol manki, ol snek, antelop, mo !plante defren kaen pijin! Afta we oli luk ol taf animol ia, oli klaem long ston mo ron long baksaed blong hos. Afta oli bin plei ol gem.

Nyamedo i hapi se hem i bin stap wetem Kwame. Sapos hem i no stap, bae hem i mestem plante taf samting!

Hem i taem blong gobak long bas, Nyamedo i luk Ralph mo Seirra. Tufala i ron i kam long hem.

“Kolosap ol manki oli ronem mifala,” Ralph i wispa. Hem i fraet smol. “Kolosap mifala i kasem kil.”

Sierra i sakem hed blong hem blong agri. “I gud ia yu no kam.”

“Wow,” Nyamedo i talem. “Mi glad se yufala i Oraet ”

Tabu Spirit i stap protektem mi ia, hem i tingting. Hem i holem han blong Kwame taem tufala i stap wokbaot tugeta i go long bas.

Hem i glad se Tabu Spirit i kipim olgeta i sef mo i bin helpem olgeta i gat wan naes advenja.