Sikret Tin

?Mama, wanem hemia?” Sadie i pulumaot wan bigfala tin long biaen blong kapbod. “Be i nogat nem long hem.”

“Mi fogetem hemia ia,” Mama i talem. “Ol nem we oli bin stap long ol tin oli stap kamaot, mekem se stoa i salem olgeta long wan jip praes. Mi bin pem wan. Mi ting se bae hem i tin blong krin bin.”

Sadie i tanem fes smol. Tin blong krin bin i no fevret blong hem.

Mama i pikimap tin ia mo i tanem. “No long taem bae oli go nogud. Yumi mas kakae olgeta tedei nomo.” Hem i putum tin long tebol.

“?Wanem ia?” Bigfala brata blong Sadie, Jason, i askem.

“?Hu i save?” Sadie i talem. “Mama i talem se hem i ol krin bin.”

Jason i seksekem tin ia. “Mi harem olsem se i no ol krin bin. Mi ting se hem i ol vejetebol sid.”

Hemia i givim wan gudfala tingting long Sadie. Hem i karem wan selotep mo maka mo raetem “ol krin bin” long wan pis pepa mo “ol vejetebol sid” long narawan. Hem i pestem olgeta long tin ia.

Afta hem i tingting blong wan smol taem afta i raetem “tomato sos” long wan narafala pis blong pepa.

Semmak taem, Papa i kam insaed long kijen. “?Wanem i hapen?”

“Mifala i stap plei wan gem,” mama i talem. “Traem talem se wanem i stap insaed long tin ia.”

Papa i pikimap tin ia mo i seksekem strong, mo i smelem. “Ol Masrum!” hem i talem.

Evriwan i komplen. “!I no ol masrum!” Sadie i talem. Hemia i moa nogud bitim ol krin bin, ol vejetebol sid, mo tomato sos. “Ating yumi mas sakemaot tin ia nomo.”

“Yu no wantem save wanem i stap insaed?” mama i askem.

Papa i karem tin opena. “!Yes mi wantem!”

Taem papa stap openem tin, Sadie i kavremap ae blong hem. Be taem hem i pulum lid i gobak biaen, Sadie i sek. Tin ia i fulap wetem ol naes fruit.

“!Yummy!” hem i talem taem hem i stap lukluk long ol pea, ol grep, ol jeri, mo ol pij we oli katem olgeta.

Jason i karem ol bol glas mo ol spun. “!Yumi kakae!”

Sadie i kasem sam frut i go long bol glas blong hem. “Mi no save bilivim nomo se yumi evriwan i rong,” hem i talem. “Mi save se i gat wan samting yaki insaed.”

“Yumi stap givim nem long ol pipol olsem ia?” mama i askem.

“?Yu stap minim wanem?” Sadie i askem.

Papa i putum bol glas blong hem long tebol. “Yumi save disaed se oli luk olsem wanem insaed, be wanem yumi save luk hem i aotsaed nomo.”

Sadie i tingting long hemia. “Taem we Samara i niu long skul, mi ting se hem i no naes. Be afta mi lanem se hem i no save toktok gud lanwis blong yumi. Naoia mitufala pleplei evri taem!”

“Hemia i wan gud eksampol,” mama i talem.

“Samtaem mi filim se oli givim nem long mi,” Jason i talem slo. “Ol pikinini long skul oli talem se mi gat ol gud mak from nomo tija i laekem mi. Be trutok, hem i we mi wok had mo mekem evri homwok blong mi.”

“?Blong givim ol nem i mekem wan i harem nogud, i tru?” Papa i talem.

Jason i sakem hed blong hem blong agri.

Sadie i kakae las pis blong ol frut blong hem. “?Be blong givim ol nem i nogud?” Long stoa yu nid blong save wanem nao yu stap pem.”

“Hemia i tru,” papa i talem. “So, ?wetaem nao blong stap givim ol nem i gud?”

Jason i leftemap spun blong hem. “Taem oli tru!”

“?Mo huia nao i save stret wanem nao i stap insaed long wan man?” mama i askem.

“Papa long Heven,” Sadie mo Jason i talem tugeta.

“!Mi kasem!” Sadie i talem. “Mi mi Pikinini blong God. Hemia i raet nem blong mi.”

“Mo mi,” Jason i talem.

“Mo mi!” papa i talem.

“Blong evriwan.” Mama i smael. “Mekem se yumi no mas givim nem long ol pipol long wanem yumi luk long aotsaed, o bilivim ol giaman nem we oli givim long yumi. From God nomo i save huia yumi stret long insaed.”

Sadie i raetem long wan niu pis blong tep mo stakem long kol set blong hem. “Wan pikinini blong God,” hem i talem. Sadie i smael. Hem i laekem nem ia tumas.

పీడీఎఫ్ ను తెరవండి

Ol pikja i kam long Róisín Hahessy