Mary mo Caroline Tufala I Sevem Ol Skripja

Mary Rollins i gat 12 yia taem hem i lanem faswan abaot Buk blong Momon. Hem i bin yusum wan kopi, mo i bin ridim buk truaot long naet.

Mary i stap glad from niufala buk ia we oli singaotem Buk blong Ol Komanmen. Bae i gat plante long ol tijing we Jisas Kraes i bin givim long Josef Smit.

Be samfala pipol oli no laekem Jos. Wan dei, sam man oli brekem bilding ia we oli stap printim Buk blong Ol Komanmen. Oli sakem masin blong print i kam aotsaed long windo mo saksakem ol pej blong ol skripja long rod.

Mary mo smol sista blong hem, Caroline, i haed mo stap waj. Mary i wantem blong sevem ol pej bifo oli go nogud. Caroline i fraet, be tufala i save se ol pej ia oli gat ol toktok blong God long hem.

Tufala sista ia i ron i go long rod mo karem plante long ol pejwe tufala save karem. Sam long ol man ia oli luk tufala mo singaot long tufala blong stop. Mary mo Caroline i holem taet strong ol pej ia mo ron i go long plantesen blong kon we i stap kolosap.

Tu(2) man i ronem tufala. Mary mo Caroline tufala i go daon long graon mo haedem ol pej blong skripja andanit long bodi blong tufala. Tufala i stap kwaet taem ol man ia i stap lukaotem tufala.

No long taem afta tufala man ia i taet. !Mary mo Caroline tufala i sef! Tufala i bin sevem ol pej blong skripja. Tedei ol tijing ia i stap long Doktrin mo Ol Kavenan.