Stap Serem Sansaen

I Kam long Lucy Stevenson Ewell

“Hemia i wan singsing blong jos blong mi,” Ángel i talem.

Wan tru stori we i kam long Ajentina.

Wan boe mo wan man i stap insaed long wan hos kat we oli droem

Ángel i klaem long kat narasaed long Papá. Glas botel blong melek i stap bang bangem olgeta biaen taem hos blong olgeta i stap ron slo i go. San i stap saen , mo i rimaenem hem long fevret singsing blong hem.

“Jisas i wantem mi blong mi saen,” Ángel i singsing.

Sam manis i pas, Ángel i bin kasem baptaes. Mamá mo smol brata blong hem, Oscar, oli kasem baptaes tu. Papá i no joenem Jos, be hem i hapi from olgeta. Ángel i tingbaot yet taem we hem i kamaot andanit long wota. Hem i olsem wom sansaen ia we hem i filim long baksaed blong hem, be long insaed.

Ángel i gohed blong singsing hemwan taem we Papá i stopem kat aotsaed long haos blong Señora Perez. Ángel i jiam daon mo karem wan botel blong melek long biaen. Señora Perez i wan long ol kastoma blong famli blong hem.

“!Dileveri!” hem i talem.

Señora Perez i stap wok long karen blong hem. “Tangkyu,” hem i talem,” taem hem i stap tekem botel. Hem i givim Ángel sam koen. “?Yu stap singsing wanem singsing ia?”

Boe i stap givim ol botel blong melek i go long wan woman

Jiks blong Ángel i hot. !Hem i no save se Señora Perez i harem hem i singsing!

“Hemia i wan singsing blong jos blong mi,” Ángel i talem. “Jos Ia blong Jisas Kraes blong Ol Lata-Dei Sent.”

Señora Perez i smael. “?Wanem nao yu save talem long mi abaot jos blong yu?”

Blong wan sot taem, Ángel i no save wanem blong talem. Afta hem i se, “Mifala i biliv se semfala jos we Jisas Kraes i setemap taem Hem i stap long wol ia i kambak bakegen.”

“Tru ia,” Señora Perez i talem. “Mi neva harem wan jos we i biliv long hemia.”

“Ating yu sud kam samtaem,” Ángel i talem. “!Gat wan naes dei!” Afta hem i ron i gobak long Papá blong help deliva ol nara melek.

Eli long Sandei moning, Ángel i wekap. Hem i save harem mama long kijen i stap mekem brekfas.

“Oscar,” Ángel i talem, “taem blong go long jos!”

Ángel mo Oscar i putum klos blong jos mo rere blong go long jos. Jos bilding i kolosap tri kilomita longwe. Hem i wan longfala wokbaot, mekem se oli mas go eli.

“Gat wan gud taem,” Papá i talem taem oli stap aot.

Taem oli stap wokbaot, Ángel i stat blong mekem tiun blong fevret singsing blong hem bakegen. Hem i mekem tiun blong singsing ia taem oli stap pasem ol haos we oli stap deliva ol melek. Hem i mekem tiun blong singsing ia taem oli stap pasem ples blong salem ol frut. Mo hem i mekem tiun blong singsing ia taem oli tanem i go long rod we jos bilding i stap long hem.

Taem oli kam insaed, Ángel i sapraes. !Señora Perez i stap ia! Hem i karem ful famli blong hem i kam wetem hem.

“Yu kam long jos!” Ángel i talem.

Señora Perez i sakem hed blong hem blong agri. “Singsing blong yu givim mi insperesen,” hem i talem. “Mi ringim mama blong yu from adres blong hem. Mi wantem kam lanem abaot jos ia blong miwan.”

Ángel i smael. Hem i jes serem gospel taem hem i singsing long wan singsing. Hem i hop se Señora Perez bae i save filim sam sansaen ia long hat blong hem tedei tu.